姜糖的愛恨
寫呢個題目猶如花式自殺，無論點寫都不能取悅所有人。但作為一個「疑似ViuTV打手」專欄，又冇理由唔寫下。
話說姜濤近日喺團綜被安排玩過山車，事前已話唔想玩，事後更表示唔舒服。節目一出就有姜糖討伐節目組，講到係「收買人命」；當然更多粉絲相信節目組揀過山車俾姜濤玩，而唔係跳樓機等更刺激嘅遊戲，已係平衝咗姜濤情況同節目效果嘅安排，粉絲們仲欣賞姜濤嘅專業，即使驚都配合演出，讚佢成長咗。由此睇到姜糖有好多種，而共通點有兩個：
第一，行動力異常強大。每年「姜濤誕」可見一斑，由應援、廣告到近年有埋無人機表演同煙花，都為追星訂下新高度，亦成功令好多人即使對無感都認識姜濤。不過呢種力量用喺網上評論，有時候就會成為咗壓力，即使出發點係維護偶像，外人眼中都係視為口誅筆伐、攻擊異己，久而久之令外界對姜糖以至姜濤都有負面觀感。
第二，當然係喜愛姜濤，但用錯方式去愛，叫做溺愛。見到偶像坐過山車咁驚而產生憐愛係可以理解，但為此要投訴、鬧埋佢嘅隊友、經理人同節目組等，就係溺愛，就好似啲「生仔未考牌」嘅父母，個仔做咩都係鬧咗人先，咁唔係保護個仔，更加會令個仔生人勿近。
姜濤玩過山車前佢講咗句︰「人生已經歷好多高高低低，又何苦要我喺機動遊戲上經歷呢？」冇咩人討論，但可以想像背後發生過嘅事，呢樣反而令我有啲感慨。我相信姜糖令姜濤嘅人氣走上好多人努力好多年都達唔到嘅高峰，但個別粉絲嘅行為及爭議，亦可能係佢經歷低潮嘅其中一個因素。
粉絲可以做嘅唔只係保護偶像，而係鼓勵佢成長同進步，就好似節目組咁，要姜濤克服對過山車嘅恐懼，就係要繼續玩，有一日練到好似佢老闆魯生咁，打坐般平靜地玩過山車。