市場不符預期
新iPhone開賣，摺機一再落空，新機又被批評欠缺創新，但開賣一樣大排長龍，炒場有價有市。而被網民瘋狂恥笑嘅「宇宙橙」新色，仲炒出新高度，逆市爆紅。「又話冇人買嘅？」呢種不符市場預期、令大家都跌晒眼鏡嘅事件，過去一星期喺娛樂圈都有發生，值得同大家探討下。
首先，「又話大台冇人睇？」大台嘅《女神配對計劃》爆紅，討論度極高。最後一集男女主角告白，GM霸氣咀葉蒨文嘅片段都係洗版式討論。有人話《中年好聲音》都多人睇，質疑只係慣性收視。但我覺得今次唔同，因為連喺年輕人集中地Threads都成為熱話，啲留言肉緊到自己係主角一樣，完全係打破年輕人唔睇電視/大台嘅都市傳說。唔止個節目，聽講節目中嘅男男女女近來都接唔少job，可以話係成功嘅「本土戀綜」。
另外，「又話冇人鍾意楊千嬅？」楊千嬅演唱會開賣即售罄，唔少歌迷仲要話搶唔到飛。楊千嬅近年主力北上發展受批評，回帶幾個星期前佢做林家謙紅館演唱會嘉賓，報道形容係「負評如潮」，仲話現場傳出噓聲，大家原本都唔睇好佢今次個唱嘅銷情。有人話今次公開發售約10,000張飛，只係4場加埋總數飛嘅四分之一，楊千嬅出道30年，點都有啲忠實粉絲。作為半個圈中人，我可以話俾大家聽，今時今日嘅市道，速售10,000張飛真係唔係咁容易。
世上有好多市場分析員，亦有好多事後解釋員，點都可以兜得返。我覺得要搵返個根本，即係個所謂「市場預期」究竟從何而來？歸根究柢，其實就係網上風評、網民意見，但大家都明白網上嘅聲音，都係比較偏激或集中喺某個群體。所以往往可能係「響亮但少數」，而主流可能會選擇沉默，所以網上意見難以代表整體意見，更加唔一定反映「消費行為」。網絡世界係放大鏡，「網絡輿論」同「現實世界」存在落差嘅事例又點止上述幾單，身體才是最誠實。