各界祝福Will柯煒林早日康復。
ERROR嘅193喺網上公開講某連登「常客」係某公司嘅打手，其實有留意開連登或娛樂圈消息嘅網民，都唔會覺得係新聞。而網民其實亦可透過一系列帳戶同背景，再歸納出背後主腦嘅關係。詳情大家自己上網搵，我喺呢度唔重複，反而想講下三點對於打手文化嘅睇法 。
1 .人類唔係追求真相，只求發洩。
隨著互聯網、短視頻甚至AI急速發展，人類耐性急速下降，每日用極多時間追求多巴胺，而偏偏真相係需要時間追求，但係發洩同刺激就令腎上腺素即時提升。當社會每人每日都被訓練追逐刺激，打手一個留言，就有即時反應，所以打手文化盛行，係建基於我哋越嚟越冇耐性 。
2.打手文化緣於個人利益，最終會釀成大眾摧毁。
打手喺網絡盛行前已出現，泛指一班收錢幫人用暴力做嘢嘅人。而網絡打手同樣都係收錢，雖然唔係出手打架，但用文字抹黑，對人嘅傷害可以更大更長遠。網絡打手成本低，但效果顯著，即使大家判斷「打手嚟㗎唔好信」，打手仍發揮到一定作用。
例如一個偶像網上發表任何嘢，都會有班打手去轟炸式負面留言，即使明知係打手行為，廣告商都會對偶像卻步。情況就好似黑社會電影橋段，搵人去對家間酒吧搞事，只要放啲蛇蟲鼠蟻，就自然冇客幫襯，但同時條街都會烏煙瘴氣，維護個人利益嘅行為最終會變成大眾摧毁。
3.打手文化唔係香港獨有，但或喺香港更發揚光大。
全世界都有打手，全世界都有陰謀論，但喺香港好似特別興盛。我諗原因都係因為香港人好勤力，打手特別落力抹黑；另一點就好似「51區」咁，到底有冇外星人呢？冇人知，但越多猜測同可能性，越容易有唔同嘅講法，一個地方越多迷霧(例如娛樂圈)打手嘅辦事效率就會更加明顯 。
PS. 其實呢個星期我最想講嘅係︰Will，快啲好返！