十大IG KOL排名又出爐，有媒體大字標題寫「MIRROR成員全數無份」，我立即八卦下點解，MIRROR係咪真係唔紅啦？輸埋俾班「媽媽級」KOL？
有廣告界同行內人分別同我講，重點喺社交媒體落廣告嘅，無論大中小型品牌，都會選擇搵返某一範疇嘅網絡KOL為主，而唔係歌手等主流藝人，因為網絡嘅行為比較垂直，即專注特定產品或範疇，例如KOL A講開時裝，KOL B講開飲食等。
以往亦有品牌想做好branding而需要較廣泛支持嘅時候會用下主流啲嘅星，所以MIRROR都會有人上過榜，不過而家經濟都真係唔好，廣告成本縮水下就只集中用返KOL，亦因此有呢個結果。當然IG都只係廣告市場嘅一個部分，唔上榜又唔等於個藝人冇廣告。撇開MIRROR唔講，廣告界寵兒Jeffrey一樣十強不入，MC等亦冇上榜，唔通佢哋全部都唔紅咩？
當然，傳媒標題咁寫法，再次證明真相同理性分析不嬲都唔重要，標題吸睛有流量先係王道，而近年嘅流量密碼已唔係MIRROR咁簡單，而係MIRROR唔紅/冇咁紅呢個概念。
紅唔紅從來都冇咩標準，係一種感覺，一種氣氛。我見到嘅係，姜濤誕姜濤灣仍然精彩﹑鏡仔出活動即使唔係假日商場仍迫滿人；最近令我比較意外嘅，係Jer喺灣仔海濱busking都係人山人海。
Jer喺自已IG上post咗條片，灣仔海濱坐滿人，拎住著咗燈嘅手機，大合唱《人類群星閃耀時》，busking有呢個場面都好少見。令我意外嘅亦唔係因為咁多人去睇，而係Jer 今時今日仲搞busking，而公司又支持佢咁做。
Jer喺2020年初推第一隻solo歌時已搞過busking，當時仲係疫情，尖沙嘴文化中心外有幾百人聽，當時係MIRROR成軍初期，搞下gimmick 玩busking 可以理解，但今時今日Jer已開過個唱、接受過日本知名音樂頻道First Take挑戰，仲去做busking，用最真嘅聲音面對觀眾，仲要冇錢賺，公司要投資六位數字。就係為咗重回Jer嘅音樂起點︰busking。
古語有云︰花無百日紅；蔡楓華亦話︰剎那光輝唔係永恆；紅唔紅或者冇標準，入行初心或者先係根本。
不做標題黨，我好努力問人︰MIRROR究竟仲紅唔紅？有個我覺得阿Q得來幾好嘅答案同大家分享下︰咁多haters，應該係紅嘅印證之一。