強烈反擊阿叔口頭禪
雖然我自己也身為一個阿叔，但我係第一代阿叔(阿叔都分好多gen嘛)。我最不喜歡聽的其中一樣，就是「阿叔口頭禪」，或者可以這樣形容——廣泛流傳的老土saying。我成日覺得好多呢啲說法都好蠢，好冇logic。講幾個你聽，再強烈反擊，你就明白我講緊咩。
呢句勉勵人的說法非常廉價：「試就一半一半，50%機會成功，50%失敗，唔試就0%機會成功！」你試試去買六合彩，看看是不是「50%機會成功，50%失敗」？買兩次中一次？就算係12碼，一係入一係唔入，都不是入50%，唔入50%的。世界上絕大部分的事情，都是有獨立機會率。機會各半的只有「擲公字」。所以人家有些事情不想試，就是因為知道成功機會率很低，接近零，所以才想試，懶得試。下次鼓勵人，不如直接講「我覺得成功率冇你想像中咁低囉。」
「又唔係成日食，食少少姐，唔怕嘅。」好多阿叔食肥膩嘢之前，都會講呢句。我成日都想反駁：「屎你唔試下食少少？山埃你試唔試少少？真係少少。」我阿爸都好喜歡講呢句，我好想答佢「我可唔可以試少少太空油(現名：依托咪酯)？食少少姐，唔怕嘅！」世上有很多事情，少少也是不可以的，例如犯少少法。但當然，我也不是不明白，現在我說的是食物嘛，有時候完全戒口也是很難，但問題其實是，他們這句差不多已經成了口頭禪，已經不是「食少少」，是「成日食少少」，其實即係「成日食」。這才是低智的原因。
「寧可信其有，人哋話拜咪拜下囉。」我到現在都仍然唔明白，何不「寧可信其冇」？人人講乜我都信，我咪好忙？每次去旅行，入酒店房都要先敲門？我從來不會！為甚麼要庸人自擾，自找麻煩？經過廟就拜個神，我也不會。「你咁反叛做咩？敲一敲要幾多時間？拜一拜要幾多精神？你做了就心安理得。」首先一來我不做也心安理得，我又沒做壞事，二來這就好像倒轉的「破窗理論」，如果小事就遷就跪拜，大的就更要拜了。「寧可信其冇」，冇神冇鬼一身輕，將所有「迷信」的時間都用來睡多一會，我的一生應該可以多睡幾個月。