尋找足球鐵人
根據transfermarket.com嘅統計，今屆頭50位上陣次數最多嘅5大聯賽球員，No.1係馬體會嘅阿根廷前鋒祖利安艾華利斯，連國際賽踢咗53場；計前列最多上陣時間係車仔嘅摩西斯卡斯度，上陣47場共4,166分鐘。兩位南美人，踢太公波更艱辛，依然耐戰力十足，難能可貴。球場鐵人有價，只係每每獨力難支，只見阿仙奴1億英鎊先生迪格蘭賴斯，呢兩季加盟後幾乎冇休息過，場場全場奔走，功能全面，貴得合理，但始終未能終止球會錦標荒。
歐洲新王者PSG全季出場最多嘅喺歐聯只任後備嘅前鋒巴特利巴高拿，44次出場但實際全季只係踢咗2,557分鐘；證明PSG近季不斷高價購入20至25歲嘅年輕精兵，打車輪戰策略成功。英超內耗嚴重但勝在各隊水頭充足，連喊窮嘅曼聯都大手筆，講明今夏增兵要快狠準嘅曼城，好快有重磅年輕新兵加入，加速隊內新陳代謝。英超尋寶，列強可試斟22歲嘅維拉三獅新星攻中摩根羅渣士，高大身形扎實，上季只缺席1場英超，可議價機會高，過埋明年世盃，只怕身價倍翻。