用返「國米」，唔該
其實，我可唔可以好認真咁，要求大家用返「國米」，叫國際米蘭做「國際」，真係離譜兼奇怪。
國米，係「國際米蘭」嘅簡稱，係將球隊嘅中文譯名簡化，而唔係Inter 嘅直譯，所以根本就一啲問題都無。我知巴塞係「地上最強」，但係試試幻想下個禮拜嘅歐聯新聞，「巴塞淘汰/惜敗/苦戰國際」，任憑賽果如何，國際都唔會及國米容易明白。這並不是因為以前用開「國米」，而係「國際」本身就已經係一個有意思，指向緊另一樣嘢嘅字，既然係咁可唔可以用返「國米」呀？
其實香港用嘅「翻譯」方法，一向好有自己一套，時而「音譯」、也有「意譯」，甚至簡單一個字兩者並用都屢見不鮮。舉個例：高貝利Highbury，一個字前後已經用晒音同埋意譯，作用係避開廣東話個「Hi」音。翻譯就係咁，要好似剛剛提到咁，發表我哋嘅語言習慣，亦都要追求「美感」，每個名都只係追求同原本嘅讀音或意思百分百準確，可能會適得其反甚至矯枉過正。就好似Djenpo變成「真尼普」，都真係幾離譜。
而家嘅譯音，特別係球員名真係做得差，經典嘅當然係麥總「安巴比」，Elliot由「艾利諾」變咗「艾利阿治」，Zirkzee係「施亞斯」，既難度又唔好聽。最離譜係麥佳亞竟然有媒體夠膽變「馬古尼」，真係災難級文盲先做得出。