英超也放棄
今個季尾英超特多例行公事，其實除咗國內外電視轉播收益，每隊起碼平分逾億英鎊收入外，聯賽每攞一分都可能好值錢。上季大約每一個英超排名差距百多萬英鎊，再用今屆排名大躍進嘅森林作例，佢哋上屆排尾4得680萬英鎊獎金；但現時暫排第6，可攞超過2,500萬英鎊，足夠佢哋下季買多半個幼獅新星中場艾利諾安達臣。
無奈放棄英超，有啲係能力有限好似尾三隊，有啲係主次有別醉心歐戰博大獎嘅傳統列強。最奇怪係排名大躍進嘅森林，季尾出返強陣，但反而跌晒watt，歐聯席位危危乎；實情係希臘船王班主手執希臘一哥奧林比亞高斯同森林兩隊，按例唔可能一齊出席到歐聯，就算近期褪軚話唔再理森林日常事務，已大大打擊球隊再上前列嘅決心。更重要係踢歐聯要A、B隊先頂得住，睇下今屆西甲基羅納有機會降班出事，就知黑馬踢歐聯，一步「升呢」隨時變糖衣陷阱。準備上任森林總監嘅前阿仙奴高層伊度，手執多一、兩億英鎊budget，來屆先爭踢歐霸，或係對個人同球會更合適嘅上位階梯。