英超壟斷歐聯
歐聯上屆起改制，一個聯賽打晒，實力分4級制，多咗強強對碰；但上屆強弱其實仍然相當分明，中、東歐球隊分組賽全軍覆沒，施洛雲同年青人更8戰全敗，每場平均失3球或以上。36支參賽隊以上、下半版為實力分水嶺，上半版有超過六成球隊今屆冧莊續戰；下半版18隊得5隊有份繼續掘金，估計「新丁」塞浦路斯帕福斯或者哈薩克卡拉特等等，今屆會係列強嘅「點心」。
英超今夏幾乎壟斷整個歐洲轉會市場，強隊瘋狂添兵，就係希望減少英超內耗同解決8日踢3場嘅難題。好似曼城大炒曼聯後，禮拜四歐聯先鬥拿玻里，再休息兩日幾就要作客倫敦鬥阿仙奴，但呢個已經係常態，唔能夠成為失敗嘅藉口。英超上屆4代表2隊直入8強，今屆6隊參加大聯賽，紐卡素似最弱，傳統Big Six嘅熱刺反而抽靚籤，唯一硬仗係作客衛冕PSG；英超兵團大膽估計有機會喺大聯賽前八名佔四或五席，西甲雙雄加埋PSG可能係其餘三強。另一焦點係俾英超掏空嘅德甲同水準一路走下坡嘅意甲，會唔會8強前已全軍覆沒？