英足盃有冷味
對英超迷嚟講，本月只剩低兩個最重要嘅日子，本周六英足盃決賽水晶宮挑戰曼城；另一場係下周三，曼聯同熱刺喺歐霸決戰。呢屆英超水準偏低，hea踢波又多；從入球數字計，上屆每場平均入3.28球，今屆暫時仲剩返兩輪共20場波，大跌至平均2.94球。再睇第34周10場入32球，第35周跌至28球，到剛過去一輪只有22球。季尾四大「主角」，曼城恥辱地和包尾修咸頓0比0，而熱刺同曼聯繼續出大部分副選應酬聯賽，又主場吞兩蛋，已淪落到守喺降班區前面兩個位置，不斷改寫兩會喺英超嘅劣績，輸到麻木，只怕下周三決賽過後，艾帥同普帥嘅敗部，要人頭落地。
排弱陣輸波避重就輕，已成兩大傳統球會季尾嘅慣用伎倆，應該會用埋嚟緊周五幫佢地度身訂做安排嘅英超尾二輪場波。反而最冇名氣嘅英足盃決賽黑馬水晶宮，近期啲「鷹」爪越磨越利，走咗米高奧利斯去拜仁，今屆淨返另一新星伊比爾治伊斯，一樣咁亮麗；鬥心係要磨出嚟，班波突擊有力，呢個盃都好耐未試過爆冷咯，王者之風唔一定係強隊。