「刁神」車路士
歐洲聯賽嘅夏季轉會市場，周二香港時間凌晨陸續關閉；其中英超一眾列強瘋狂入貨，暫時將公平財政條例先放埋一邊，玩到最盡係車路士，以transfemarket.com計算，最新列出簽入9位新兵，出售13人(已唔計大量外借)，淨支出只係約1,000萬歐元，大概只係隊長安素費南迪斯一年波糧。呢班買入球員平均年齡20歲，出售嘅平均24歲，如果球隊維持一定成績，幾年後仍大把人肯接貨。
生意貨如輪轉，究竟今屆贏唔贏到英超或歐聯兩大選項？9大新兵，暫時最對辦係祖奧柏度，最有潛力係巴西新星艾斯迪維奧；但買人側重翼鋒，利安戴納一傷，即騰雞急召棄將中鋒積遜救亡，其實不論中堅、攻中同箭頭位置都未係全面補強同頂級。開季頭3戰都係倫敦打吡賽程有利，但啱啱場波唔係VAR房誤判富咸入波先食詐胡，車仔勢陷苦戰；國際賽返嚟第一場歐聯作客拜仁，先係真正睇辦戰。
仲有一年合約、32萬5,000英鎊周薪嘅史達寧冇聽過有人吼，好在沙特轉會窗下周三先關閉，「刁神」車路士要繼續努力！