誰令MIRROR馬來西亞演唱會取消？

MIRROR首個巡唱，唔止香港16場爆滿，去到英國、美國、加拿大6個城市都成功舉辦。喺美國仲上埋Fox同CNN具份量嘅媒體做訪問，香港歌手來講確係少見。見佢哋喺倫敦同多倫多兩站，粉絲接機嘅場面墟冚，當地朋友亦話一票難求，澳門仲兩次加場。正當勢頭一時無兩，馬來西亞站主辦竟然話取消演唱會，喺度同大家分享下我八到嘅嘢。

歌手去外地巡唱，一般會同當地公司合作，由佢哋訂場地、定票價、傾贊助等等，而今次主辦單位就叫UnUsUaL。至於經理人公司，今次即係Makerville啦，就係負責出歌手，亦即係MIRROR啦，同埋做好個騷，其他嘢就控制亦決定唔到。

揀個咩場地定咩票價，好睇主辦個心有幾紅；歌手喺「原產地」幾紅都好，去到外地有幾多fans，點先賺到錢，要視乎主辦判斷力。聽講加拿大個主辦就有少少保守，揀咗個\細場地，滿足唔到當地嘅需要，好多人都買唔到飛。但睇呢個主辦UnUsUaL，同時負責馬來西亞同新加坡站，兩個地方同日子都咁近，會唔會唔使訂咁大個場，或者一個站滿足晒星馬fans就得？唔止場地，票價亦反映主辦超級進取，唔少haters知道MIRROR演唱會取消後，就立即同將會喺同一場地開騷嘅台灣樂隊告五人比較，話人哋一早賣晒飛云云。我睇真啲，告五人票價由238至1,288馬幣不等，即最平唔使400蚊港紙就可以入場，MIRROR呢？最平嗰張要488馬幣，足足貴一倍，點比較？

俾多個參考大家，韓國國民天后IU，第一次來香港開演唱會，主辦都係揀咗個2,000人嘅九展場。UnUsUaL喺馬來西亞站，場地同票價都咁進取，係佢哋太有信心定太心急搵錢呢？

我查下UnUsUaL嘅背景，睇完我明咗成件事，UnUsUaL嘅最大股東係香港人較為熟悉嘅一間公司，叫MM2，係姜濤參演嘅電影《我的天堂城市》嘅主要投資者。大家仲記唔得，呢套電影上畫嘅時候，首映禮台上發生過咩事呢？本欄上年10月就曾經寫過，歡迎大家參考返。