冧檔、內訌、復興

足球場上冇永遠無敵之師，睇到紅軍嘅高位壓逼踢法，一度盡顯霸氣，各隊爭相仿效；喺高普自2015年帶領下，即攞當屆歐霸亞軍起踏入盛世，到本季季中突然事先張揚季尾離隊，如今爭4冠王極速夢碎，更喺剛戰出現疑似內訌，沙拿場邊怒罵呢位一代英超偉大領隊，紅軍低處未算低。復興重任交下任大熱繼任人、只攞過一屆荷甲冠軍嘅光頭佬史諾處理，紅迷點會唔擔心。

費爵爺2013年退休，紅魔即失霸氣，不斷換領隊，來屆歐聯席位都攞唔返；雲爺爺2018年被半逼走，阿仙奴呢20年無法再染指英超，今屆跟藍月繼續纏鬥，復興現曙光。史諾只攞過一屆荷甲冠軍，級數未證明，但無謂無限想像係另一架紅魔「坦克」；紅軍要縮短陣痛期必要狠心改革，以無限體力打高位壓逼、但又攻極唔入，此路已不通。先放走沙拿，換嚟資金買到識入波嘅前鋒，一如當年放走古天奴俾巴塞；另外最大功課係荷蘭人華基爾雲迪積克，膝傷後加上年紀，戰力已減，紅軍防守危機重重，新荷蘭主帥肯大義滅親？