丁子朗今日（11日）出席劇集《俠醫》宣傳活動。（娛樂組攝）
丁子朗今日（11日）出席劇集《俠醫》宣傳活動，並在活動現場展現射箭的技術，非常有型！丁子朗接受訪問分享在劇中飾演奸角收到許多網民留言鬧，所以感到受寵若驚。他續說留意到網民留言表示：「如果一早做奸人就紅咗，做好人就會唔拖唔水，做壞人反而會乾淨俐落。」他指鄭子誠啟發了他如何揣摩奸角的角色。
丁子朗今指鄭子誠啟發了他如何揣摩奸角的角色。（娛樂組攝）
演奸角喪盡天良預告殺人放火
被問到最難演繹的地方，他表示：「最難演嘅地方反而係後半段，而家都係小兒科，溝女同埋搶人哋女朋友，後半段就會殺人放火同埋推人落樓。我睇劇本嘅時候都發覺點解編劇要寫呢啲劇情出嚟，明明係醫療劇。」講到劇情中需要與女演員拍攝親密鏡頭，他說：「辛苦咁多女演員嘅配合，同埋好多謝監製嘅安排。有網民話呢一套劇集係《俠醫之家好月圓幕後玩家》或者似《溏心風暴》，好似TVB經典劇集嘅醫療劇。」他透露在劇中會有脫女星絲襪錫腳情節。
丁子朗透露在劇中會有脫女星絲襪錫腳情節。（娛樂組攝）
奉勸年輕人唔好影裸照
講到飾演奸角會否擔心影響形象，他坦言：「最初接呢套戲嘅時候都會諗觀眾係咪會唔鍾意？丁丁好似不嬲都唔係就呢個路線，有人睇已經覺得好開心。」至於在劇中說出驚人的對白鬧「地產雞」，他說：「本身個劇本已經寫得好極致，可能會有啲監製會再寫得肉緊啲，其實鬧地產雞嗰一場戲想令到劉佩玥更加羞愧，已經講到佢係瞓喺張床度簽單，已經都係俗語。為咗配合劇情需要再講多一句令佢心靈受損，呢樣嘢真係唔係幾好嘅事。同埋嗰一場劇情係講我哋分享大家嘅裸照俾大家睇，奉勸年輕人真係唔好影裸照。」
提到有份演出的短劇《搏憶》，他分享：「真係好開心，坦白講睇到新嘅世界，一個新嘅體驗，因為講普通話嘅演繹對我嚟講都係一個挑戰，嚟緊都會keep住有好多唔同嘅戲接洽緊，同埋考慮拍。」講到有網民指講普通話非常流利，他表示在北京有不斷上課學習，希望能夠將勤補拙！