Edan呂爵安剖白出道7年的成長心路。(蘇文傑攝)
MIRROR成員呂爵安(Edan)今年8月迎來人生第二次個人演唱會《EDAN LUI "e to E" LIVE 2025》，顧名思義，「e to E」喻意成長，這一課必須坦誠面對自己。從前年個唱Talk Show的「ED偶像」三件事，到去年經歷人生低潮，向來理性兼EQ高的Edan坦言，驚見emo和恐懼的自己，頓感陌生迷惘，幸有「爵屎」、「樹窿」隊友盧瀚霆(Anson Lo)和溫暖的花姐陪伴度過，更獲Anson Lo送贈水晶護身。回想走過的每一步，Edan不感後悔，「事情既已發生，後悔也沒用。」與其不斷問點解，倒不如吸取經驗，讓挫折經歷成為寶貴的成長課。
不堪回首仍掛念「細楷e」
Edan表示，演唱會概念源自即將推出的新歌，由Oscar填詞，講述如何成就現在的「大楷E」。當年才21歲的傻更更大學生，從《全民造星》反白眼的鋼琴小子，已蛻變成唱歌、演戲和綜藝都各有發展的人氣偶像。晃眼7年，Edan直言偶爾亦會掛念「細楷e」，半說笑指有時被爵屎tag，回看《造星1》的表演、初出道的訪問、拍《調教你MIRROR》的自己，「真係大個咗，被社會摧殘不少，真係靚仔咗，浴火重生。」
他笑言不捨得流失的膠原蛋白、消失的濃密髮線，也有不堪回首的造型，「幸好我沒甚麼偶包，笑得我最勁可能係著黃色湖人波衫背心，胳肋底毛爆晒出來，都激癲，諗住好少著背心，夏天露吓手臂，點知被人笑到……那個海膽，fans都應該影唔少。」自嘲過後，Edan坦言，「都會掛住那種青蔥、清澀和傻更更，成長就是有得也有失。可能以前沒諗太多，剛出道時就只有『做』字，沒甚麼人認識和談論，漸漸真係有各方壓力，不能夠唔諗多啲，可能就係大個咗嘅煩惱。」
堅持「ED偶像」有領悟
兩年前的首個solo con《EDAN LUI "IN MY SIGHT OF E"》，其中一大特色是talk show環節，Edan坦言今次仍想保留這特色，「上次大家睇完都話係『好Edan』的演唱會，今次都希望做到。」不過距離開show僅餘個半月，不能重複上次與《造星2》B3組Godric、Benson、肥豐及John Mak的合作，最終要視乎是有沒有足夠時間獨自構思，拿捏界線亦不容易。當年talk show主題「ED偶像」，引起不少迴響，Edan不諱言，「那時有股衝勁，未必是壞事，意識到講和實行，原來真係冇咁簡單，要有心理準備，要知自己係咪頂得順，唔係咁簡單。那時自己覺得啱就做，但這個世界未必可以咁運作，如果咁做，你承唔承受到個代價，要自己衝量。」若今年真的再做，他直言在拿捏尺度、表達得體方面，要有更成熟的表現。
壓力累積感困擾
曾在個唱中提出做偶像的三件事，包括：講啱嘅事、做啱嘅事、做要做嘅事，相隔2年，歷過低潮後的Edan仍持守三大原則，但不忘補充，「7年以來累積的感受，一直覺得我抗壓能力好強、EQ好高，但可能累積到某一個程度，會變成困擾，呢啲係始料未及嘅事，要自己消化。例如做偶像明星，冇私人時間同生活，去到邊都可能被人影到，開頭都覺得沒甚麼，但當時間長了就有另一感受，好似去邊都冇得放鬆，要同自己溝通調節。」Edan坦言仍未掌握箇中平衡，或許不同階段有不同調節，目前只能做能認真做好本份。
與「爵屎」互相給力
Edan從兩屆《造星》、《男排女將》、《大叔的愛》，都抱持「盡力做我這手牌」的心態勇於突破，隨著事業漸有成就，再經歷娛樂圈殘酷的洗禮，問他可會少了無所畏懼的「底氣」，他認為，「未必是有冇底氣讓我想點就點，而是究竟點樣才算適合，有冇最好最啱嘅選擇，都是摸索階段。」在自我質疑的階段，他感激爵屎仍明白支持，尤其是他們分享從自身艱難經歷，「因我的出現，竟能帶來一點力量和溫暖，捱過艱難時間，令我覺得所做嘅事，變得有意義，應該繼續堅持。」
理性底 也有emo時
Edan去年經歷人生低潮，與林明禎的「戀聞」鬧得沸沸揚揚，他曾表示《純銀子彈》正是在足不出戶的日子，啟發創作靈感。經過沉澱思索，Edan直言發現從未見過的自己，「其實會不習慣會驚，不想自己是這樣，但慢慢會發現，全部都是你一部分，我們都是人，開始理解人類這生物原來好撠，所以要學習接受自己不同情緒狀態，可能這才是真正、完整的自己。」他笑言28歲仍處於探索過程，作為藝人，最有趣是在公眾見證下成長，「絕對不會100%了解自己，還有很長的路要走。」
骨子裡的硬頸
低潮時期，可曾擔心失去甚麼？Edan稍作思考，「可能有一種恐懼，或者也可形容為擔心失去，當你本身已習慣擁有，原來發現可能會失去，那刻就會有種恐懼，會驚會點呢？但其實只要你本身core夠實淨，就不用想太多。」問他可有一刻後悔時，Edan毫不猶豫答道，「咁就冇，一直覺得自己做正確嘅事。我覺得人生很多事情既已發生，你可以『哎呀』，但後悔也沒用，不斷想點解會這樣，其實幫不到整件事，反而要不斷從經歷中學習。」他自言處事也算成熟，但骨子裡的硬頸會被視為幼稚，「當我真係覺得唔啱，會有種硬頸喺骨子裡，但可能在成年人世界或社會，會認為是幼稚或多餘，仍要不斷學習拿捏。」
獲贈水晶超感動
在Edan感迷失的日子，感激有Anson Lo作「樹窿」，「他經常都會陪我，都會跟他分享，好有趣的角色對調，竟然是我找他傾訴，連他都說沒見過這樣的我。」至於Anson Lo有甚麼金石良言？Edan笑言，「他借了一些水晶給我戴，佢話『你唔好理，戴咗先啦！』其實好多謝他，因為是好貼身的東西。」他續說，「他比較感性，看事情的角度，有時跟我不同，當面對問題，可聽多一個角度的意見。」當然少不了花姐，Edan坦言經常諮詢她意見，讓他感受一份溫暖，「她會說『你有咩需要我就幫你』、『我點都撐你』，令我感到好warm，身邊有人支持。」
文：Grace 攝：蘇文傑
髮型：Man Chan @ CHIC Private I Salon
化妝：San Chan, Jenny Fung
服裝：Kinyan Lam, Christian Louboutin
造型：Anson Lau
場地：KERRY HOTEL HONG KONG
ADVERTISEMENT
20周年「全城撐本地消費3重大激賞」！ 即睇活動詳情！
