娛樂
2022-08-12 15:45:19

嚴選十大網民「後悔迷過嘅偶像」 楊千嬅成冠軍 誰是搖滾叛徒?

分享:

楊千嬅成網民「後悔迷過嘅偶像」之冠 「他」做一事引發割席潮:人生恥辱

日前有網民於討論區以「以前有無中意過一D(啲)明星依家諗返起好後悔?」為題發文,當中較多人直指係楊千嬅,不過唔少結果都令人意想不到,例如好多人都話覺得佢唱歌其實唔錯,只係被「亞太區男歌手」一獎耽誤嘅林峯,以及圈中其中一對頻頻曬恩愛嘅夫妻,一齊睇吓網民後悔迷過嘅偶像有邊10位啦!

楊千嬅似「行走的翻版CD」

唔少網民指唔知以前鐘意楊千嬅啲乜:「少女的祈禱,幫左佢囉」、「唔講live、唔講人品,佢啲歌又真係正嘅」、「冇夕爺邊有楊千嬅」等等。楊千嬅透過參選新秀入行,唱出多首琅琅上口嘅歌曲,例如《少女的祈禱》、《勇》、《可惜我是水瓶座》等等。近年主力喺內地發展嘅楊千嬅係綜藝節目常客,不過唱功就被批似足「行走的翻版CD」;早前參加《聲生不息》再次惹起話題,又突發加盟華納唱片,貌似要回歸香港樂壇。

楊千嬅

 

蕭正楠唱功不及以前

蕭正楠早前都喺內地拍劇及直播帶貨,但估唔到佢擁有一把好聲音。蕭正楠當年透過歌唱比賽出道,初出道時更被指「翻版鄭伊健」。不過,討論區帖文留言中,好多人都唔知蕭正楠以前係唱歌出身。有網民表示蕭正楠以前聽係感覺幾好,但呢幾年就唔同咗:「近幾年再拎返嚟聽都覺得唱得幾難聽下,d(啲)技巧同呼吸位仲有咬字」,亦有網民覺得以前嘅歌好聽啲。

蕭正楠

 

黃翠如轉會無綫惹整容疑雲

黃翠如當年有線出身,主持旅遊節目經驗豐富;自轉會無綫後拍攝多套劇集,變成演員。隨與蕭正楠愛得高調,黃翠如嘅透光鼻卻惹整容疑雲;網民話覺得以前嘅黃翠如較敢言。

黃翠如

 

林峯「年過四十老土又娘」

林峯當年出道冇耐就得到《尋秦記》飾演秦始皇贏政機會,亦係呢個角色令佢成功得到關注,之後喺唔同劇集都擔任重要角色成為一線小生;林峯仲有推出歌唱作品,包括唔少劇集歌,喺2016年仲開咗連續3場《Heart Attack》紅館演唱會。不過有網民就表示:「年過四十的林峯老土又娘」、「自從娶內地妻後,就在內地落地生根,無意」、「俾TVB捧殺」等等。

林峯

 

方力申緋聞多多

方力申出道前曾代表香港游泳隊出戰奧運,「香港飛魚王子」形象正面,與鄧麗欣Stephy組成情侶檔廣受歡迎;不過自與Stephy結束10年愛情長跑後形象大跌,緋聞多多嘅方力申更被指係溝女王,網民就留言直指,依家淨係鍾意Stephy。

方力申

 

王祖藍染紅失民心

王祖藍笑匠形象深入民心,又有把靚聲,深得網民喜愛;不過,自王祖藍近年將事業重心轉往內地發展,隨即跌粉:「成個人都染紅,好後悔鍾意過王祖藍!」

王祖藍

 

鄧健泓賣慘感到煩厭

網民仲提到鄧健泓,表示鄧健泓主持《閃電傳真機》時已鍾意佢;又有網民指細個唔知點解覺得佢好有型,應該係鬼揞眼,又對鄧健泓離開TVB後成日賣慘感到煩厭,例如曾在擔任ViuTV音樂節目《Chill Club》表演嘉賓時,自嘲過去奪獎次數唔多。

鄧健泓

 

周柏豪為網民「人生恥辱」

有網民用上「人生恥辱」形容鍾意過周柏豪,表示自從周柏豪接受陳百祥訪問就徹底心死,周柏豪又曾喺社交媒體表態:「感激自己身為一個中國人」,唔少粉絲都對佢「愛國歌手」呢個身份感到失望,引發割席潮。

周柏豪

 

Supper Moment唱回歸歌離棄搖滾

Supper Moment《無盡》、《幸福之歌》、《最後晚餐》等歌曲無人不曉,樂隊追夢過程令人佩服。本應係許多年輕人偶像嘅Supper Moment自與胡楓於《開心大綜藝》唱回歸歌、又指未來將投放更多時間喺大灣區發展之後,被網民封為「搖滾叛徒」,同樣引發一場歌迷離棄潮,有網民仲表示當年去埋澳門睇演唱會,而家Del晒啲歌一首不留。

Supper Moment

 

羅志祥被爆多人運動

羅志祥歌功及舞技都有一定實力,加上搞笑主持風格深得民心;不過2020年被爆多人運動,及與旗下藝人愷樂發生不正當男女關係,演藝事業全面停擺,至今沉寂近兩年。

羅志祥

 

原文刊登於 Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受