《東張西望》截圖
TVB資訊節目《東張西望》周一（28日）報道一單家長對小學面試班導師嘅投訴，控訴老師態度惡劣，其教學方式如同「軍訓」。大批家長分別向《東張西望》提出過往小朋友受到嘅苟刻對待，家長A表示，其子女因未有即時舉手回答問題而遭老師針對，當小朋友最終舉手作答時，老師仍當眾責罵：「已經上咗23分鐘啦，你先第一次舉手，你知唔知你浪費緊我時間。」家長們提供影片，影片中老師兇神惡煞，不停責罵小朋友，有小朋友被嚇到眼皮跳，卻被老師指責擠眉弄眼。
家長：小朋友抵達學校附近驚到瀨尿
家長B表示小朋友站立時稍有郁動都會畀老師罵，有受訪小朋友向節目組表示感到「驚」。家長C則指出小朋友因為太驚而喺抵達學校附近時，喺車上瀨尿，竟然語帶自卑地詢問：「爸爸我係咪好無用啊？Miss都話我好無用，咩都唔識。」
唔少家長亦指出老師讓小朋友們之間惡性競爭互相攀比：「頭先個女仔佢啲禮物多到咁，如果你依家去到女拔萃見到佢，你輸啦！」更過分嘅係，有家長指老師對小朋友作出人身攻擊，話佢小朋友醜樣：「佢唔小心衝口而出話我小朋友醜樣，佢後尾就知道自己講錯嘢，好快話佢都可愛嘅，佢都有佢可愛之處。不過佢話始終建議我哋去面試嘅時候，畀小朋友戴返個口罩，遮住佢個樣，佢話驚老師見到佢個樣會扣印象分。」
隨事件發酵，面試班於網上留言區貼出律師信，警告大家唔好誹謗以及揭露隱私，《東張西望》節目組亦收到懷疑係涉事老師嘅WhatsApp，對方表示事件已進入司法程序，警告《東張西望》唔好再報道，否則會聯絡律師。節目組前往涉事教育中心了解事件，得悉教育中心已發聲明與該導師終止合作。
原文刊登於 Yahoo 娛樂圈
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
