柯煒林首踏舞台演《笨蕉大劇院》 哽咽謝幕感激抗癌路上獲陪伴
柯煒林(Will)於7月底公布患腺癌第四期癌，首次演出舞台劇《笨蕉大劇院》雖改由余家溢頂替，但每晚仍會現身支持團隊並踩台謝幕。昨午（5日）柯煒林在社交平台上載自拍照，寫著「I wish you a happy friday」作預告，在昨晚(周五)第25場獻上人生第一次的舞台劇演出。舞台劇的官方專頁亦公布他與余家溢將分擔餘下場次的演出。
因參演《笨蕉》公布病情
昨晚完成演出後，柯煒林穿著白色背心戲服，狀態甚fit，雙臂亦見「老鼠仔」，在謝幕時獲得熱烈掌聲，滿心感激的他剖白道，「由8月8日到而家係經歷咗一段好長嘅時間，呢一劇我只想同大家講，舞台劇嘅魔力真係好大，有時覺得唔太好彩患咗呢個病，但亦好彩喺呢個時候我知有呢個病，因為咁啱呢個時間《笨蕉》所有人都陪我度過。由大家認識我到而家，我都係一個演員，我好少會特意講私人事情，好少提演戲以外東西，我一直知道演員本份，如果唔係有呢個舞台劇，我未必會公布患病呢件事，但亦因為公布後得到咁多嘅愛。」
柯煒林完成第一次的舞台劇《笨蕉大劇院》演出，謝幕時一度哽咽。
感激陪伴：其實同佢哋唔係好熟
首次參演舞台劇的他半說笑，「得到咁多愛後，我亦慢慢恢復，我下一步就希望帶畀大家更好作品，唔好話病唔病，我係第一次踩台，而我係俾你哋…你哋魔力真係好大，呢個病除令我學到一些事，在演員本份亦學多咗一課，我希望可以繼續繼續繼續演戲演落去，因為呢個就係我生活，我會保持生活如常，點解我返嚟就係咁嘅原因。呢段時間除咗家人，陪我行係佢哋(《笨蕉》團隊)，其實同佢哋唔係好熟(他開始哽咽)……但因著佢哋陪伴，令我行得輕鬆咗。所以我會繼續演好每個角色，做好演員本份。」
林海峰在社交平台發布柯煒林謝幕時的照片。
林海峰送祝福
說畢，他跟台上各台前幕後擁抱道謝，特別跟臨危受命的余家溢緊緊相擁。而林海峰亦在社交平台分享在台上跟Will一起謝幕的照片，寫道：「今晚係Will嘅第一場，笨蕉第25場，希望笨蕉越做越好，身體越黎越好！到時唔好話放風箏放熱氣球，放火箭放穿梭機都得！」
ADVERTISEMENT
立即更新/下載AM730手機APP 體驗升級功能
