2025-07-23 14:00:00

麻雀樂團｜郭柏妍20年首度剪短頭髮落髮可愛忍淚表情包逐格睇

由《強人》系列金牌監製羅永賢Marco、夥拍其最佳拍檔黃偉強編審的《麻雀樂團》，將由下周一（28日）開始、逢周一至五晚八點半翡翠台播映，主要演員有譚俊彥、李佳芯、郭柏妍、姜大衛、韋家雄、何啟南、黃庭鋒、胡敏芝及謝東閔！以「碰出歡笑聲，食出人情味」作為重點宣傳口號的《》，是一套圍繞親情作為主題的輕鬆溫情小品！劇情主要大龍鳳麻雀館第二代老闆司徒久（譚俊彥飾），與親生女兒沈家明（郭柏妍Rosita飾）一波多折的相認故事。近年劇集作品浪接浪的郭柏妍Rosita，這次一改長髮女性化形象，剪了一頭清爽短髮飾演熱愛大提琴的純真少女，望落被真實年齡27歲還要青春，感覺就像大學生一樣！原來這一切又是監製Marco的意思。

郭柏妍接受官方訪問時，坦言足足超過20年沒有剪過短頭髮，故今次為新劇角色剪頭髮前確實十分不捨：「我由細到大都好少剪短頭髮，唯一一次係我婆婆叫我剪，剪完之後發現其實唔係好啱自己，之後嗰20年都冇試過短頭髮，所以呢次對於我嚟講係一個幾大膽嘅嘗試同挑戰。其實我都好唔捨得，監製叫我剪時我都覺得：『真係剪架？』但後來我覺得作為演員，呢個都係幾大嘅突破，同埋頭髮剪短咗可以留長番架嘛。」Rosita又感激監製及梳化工作人員，為顧及其感受，用了很多時間為其設計適合的靚靚短髮Look：「呢個短頭髮真係試咗好多次唔同造型，好多謝工作人員同監製咁用心幫我做一個適合我嘅短髮，希望大家都會鍾意我呢個新形象啦。」

為了紀念20多年來首度剪短頭髮，郭柏妍還將重要的剪髮Moment拍成視頻兼放上網，片段所見，Rosita剪髮期間雖然表現緊張，嘟嘴兼流露不捨眼神之餘，還一度激動至眼泛淚光。雖然如此，Rosita仍努力保持冷靜以免嚇親髮型師，又對髮型師所有指令言聽計從，相當乖巧！除了變髮，Rosita還為了角色專誠學拉大提琴；劇組透露，由於Rosita在劇中有不少拉大提琴場口，為了拍出好效果，Rosita於開劇前數個月已秘密練兵日拉夜拉，而且還會自動自覺將居家拍攝的練習片段傳送給劇組過目，希望找出可以改善的地方。觀乎劇組提供的郭柏妍練習照片，Rosita竟將數張疑似家居Look的練習照打了「特別的馬賽克」，相當搞笑！

Rosita受訪時，透露雖然自己有玩開單簧管，但由於與拉大提琴是兩回事，故必須由頭學起，而且是每天都不能偷懶要密密練。「好多謝監製畀咗個好好嘅機會我學大提琴，但嗰時因為好不幸喺台灣踩滑板時整親手，一路都唔係幾好得番，有段時間真係拉唔到。不過一好番我就即刻上番堂，好多謝公司安排咗大提琴老師手把手教我，另外我都有日日返屋企自己練，因為大提琴係一樣需要持之以恒、一再練習嘅樂器。雖然我同專業仲爭好遠好遠，但我希望盡最大能力，等觀眾喺劇集上見到我時，會有少少覺得呢個女仔都真係似拉緊大提琴，知道同專業差好遠，希望大家都見到我少少嘅努力。」問到大提琴如此龐大，出入時有否造成不便時，Rosita坦言乘搭交通工具時確實很易撞到人或是被人撞到，並因而對學習大件樂器的音樂愛好者更為尊敬：「學咁大學器嘅朋友仔真係唔容易架，真係要好有恒心同好鍾意先可以堅持到。」