2019-04-20 12:35:00

【安心偷食】落選港男爆料：男方一早想離婚心穎只是受害者網民鬧爆

藝人黃心穎與許志安偷食片段曝光，當事人及他們的另一半均已作出回應，黃心穎遭網民唾棄人氣直插谷底。凌晨卻有圈中人替黃心穎不值而爆料，指有人婚姻一早出現問題並打算離婚，黃心穎才願意跟對方一起，又指她只係一個追求愛情的女子，卻一個人「攬晒上身」不回應，指黃心穎只是愛錯一個人，她只是一個受害者！

爆料人為落選港男梁裕恆(Flow Leung)，他在社交網站上載與黃心穎的合照，寫道「突然醒起一些事情，不吐不快。醒起有一日佢好唔開心咁同我講因為同男朋友好小機會見面，感情出左問題，又話愛上左另一個男人係有婦之夫，好內疚。那個是天后的老公，但那個男人說佢地既婚姻一早出左問題，個男人同佢講會離婚，她才願意跟他一起。如果係咁她只是一個受害者。事件報道後，無人同佢講過一句公道說話。我亦唔明點解她一句都唔回應，一個人攬晒上身。個男人唔係有錢？又唔係好樣？佢又唔係賣身，只是一個追求愛情既女仔。個男人無野比到佢，就只是愛錯一個人，係有錯，但罪不至死！」

言論立即引來大批網民圍插，至今有二千多個留言，有人批評Flow的價值觀好有問題，亦有人引用許志安道歉言論諷刺Flow「牙健身教練你係咪都想暫停一下工作重新搵一搵你自己？」

不過Flow似乎無懼批評，再於社交網站張貼一張五格漫畫，講述主角看到四圍的人都受了傷，自己卻如鶴立雞群，惟有將自己都打傷，似乎有暗示。結果繼續引來大批網民批評，有網民指他「做完傻仔仲好似天下皆醉我獨醒咁款，真係寫個服字俾你」，亦有網民指鬧都「嘥氣」。