90年代日本籃球漫畫經典《男兒當入樽》，喺1996年連載完結之後，去年初已經宣佈開拍動畫版電影《THE FIRST SLAM DUNK》。電影敲定今年12月上映，早前就有疑似官方海報流出，去到尋日終於見埋預告片。
不過呢條20秒預告片，扣除頭頭尾尾只得7秒真正內容，見到湘北五大主力各有畫面，最後以隊長赤木一記入樽作結，fans表示唔夠喉！
由原作者井上雄彥公布開拍電影版以來，關於套戲嘅消息相當少，即使加埋呢條預告片，都解答唔到幾個疑團︰到底電影版故事會係來自已經出版嘅《男兒當入樽》漫畫，定係全新創作？故事時間點係咪設定於湘北落敗之後下一個球季，定係之後幾年……甚至係成年版？
《男兒當入樽》完成連載之後，井上雄彥曾經喺一間高中校舍用粉筆繪畫短篇，描述湘北落敗全國大賽後十日，各人嘅生活狀況。裡面提到赤木退出籃球隊，宮城成為新隊長，而預告反而見到赤木入樽，令觀眾更難估到底《THE FIRST SLAM DUNK》會唔會係將漫畫嘅段落拍成電影！如果係取材自漫畫，又會係將邊場對決重現銀幕？
而家到上映仲有5個月時間，應該會繼續唧牙膏式放料，慢慢等！