泳兒親自解讀《散光》寓意歌詞藏入行20年感觸

歌手泳兒亮相由新城知訊台與廣東廣播電視台音樂之聲聯播節目《灣區聲勢力》，大談新歌《散光》的創作故事，並透露歌詞藏有入行20年的感觸。

泳兒親自解讀《散光》歌曲寓意：「借用人眼睛有『散光』嘅狀態，睇嘢好矇，所有事物本身有瑕疵，但因為睇唔清就覺得好靚，比喻喺愛情路上可能因為睇唔清而揀咗唔適合嘅人，但當時仲以為對方好完美。」今年是泳兒入行20周年，歌詞中特別加入了一句「有誰來愛我再廿年亦有機會抽中我」，巧妙呼應她過往的作品，同時扣連出道20年的節點。

8月初廣州開音樂會

泳兒分享唱這首歌的感受時表示：「我唱呢首歌嘅時候唔係完全當情歌咁唱，我覺得有時模糊啲，做錯咗一啲當刻你覺得啱嘅決定，但事後睇返唔係最好嘅決定，都可能係有散光嘅狀態。」她續指：「好大嘅感覺係，再20年都有機會揀中我，唔一定係愛情揀中你，或者機會揀中你，或者事業揀中你，我有好多複雜嘅情緒，就有一個flashback，諗返呢20年自己做過嘅嘢。」

這次《散光》MV，泳兒再次挑戰執導，MV中有一場崩潰爆喊的戲份，泳兒透露為了投入情緒，事前喝了少量威士忌幫助入戲。她笑言：「真喊，爆喊，一take過！成日都喺度準備情緒，因為我知道每次唱《純情有罪》都會喊，只要專注諗住歌詞就做到。」泳兒在節目尾聲介紹即將舉行的音樂會：「8月1號我會喺廣州舉行『The Present』巡迴音樂會，到時會唱好多唔同風格嘅歌，例如《散光》同埋暗黑系列嘅歌，如果大家想嚟聽呢啲歌，就嚟睇我音樂會啦。」

衛蘭國語新歌奪冠

同節目，衛蘭的全新國語歌《不藥而癒》榮獲本周「大灣區音樂榜」冠軍歌。衛蘭專程拍片分享得獎感受：「Hello大家好，我係Janice衛蘭。好開心呀，我首新國語歌《不藥而癒》攞到大灣區音樂榜冠軍歌！好多謝新城知訊台、廣東廣播電視台音樂之聲同埋所有內地嘅歌迷。」她表示這次與一班新的班底合作，亦拍攝了MV，呼籲大家多多支持：「大家都可以去睇吓㗎。我好期待快啲推出我嘅新國語專輯俾大家聽。好感恩大家咁鍾意呢首歌，因為我自己都好鍾意，希望可以療癒到大家。」