COLLAR成員蘇雅琳Ivy So今日（4日）25歲生日，現身銅鑼灣出席雪糕品牌活動，並與fans舉行生日派對，她笑言是「半50」歲，「有種大人嘅感覺。」她表示近日忙於拍《金秘書為何那樣》，平均每日僅睡4小時，生日雖然要開工，深信全年會行運，今晚收工可與家人吃飯已很滿足，「今年太忙，差唔多到有一個月冇返屋企齊人食飯，願望係多啲同屋企人相處，同埋身體健康。」
人肉卡路里警報器
談到與MIRROR成員盧瀚霆Anson Lo合作拍劇，Ivy So大爆對方非常自律，猶如「人肉卡路里警報器」，收到4個生日蛋糕都不敢放肆大吃，「其有時都會食多咗，阿Lo就會話呢個300卡、嗰個400卡，都仲有100卡剩，有人監督住。」她表示雙方會互相督促節食和健身，亦很佩服對方，經常空肚飲至少4杯齋啡，務求保持身形拍除衫咀戲。由於拍攝行程緊密，兩人不時萬歲慰勞劇組人員。
圍觀下拍咀戲
其實Ivy So與Anson Lo已拍了不少街頭咀戲，更在fans圍觀下拍攝，「一開始好驚，因為佢背住好多fans，我又對住好多鏡頭，但roll機都冇乜嘢，佢哋好nice。」她笑言，fans圍觀拍攝的短片，足以整合成一套短劇，順便當宣傳。她又形容指阿Lo很有「霸總」氣概，笑指他非常大力，更被對方取笑，「每次佢眼瞓就叫我打佢手板，成日嫌我太細力。」
咀到嘴唇發腫？
至於拍咀戲的事前準備，她自爆拍到嘴唇發腫，並投訴被Anson Lo取笑，「我準備咗牙刷，佢係咁笑我，問我做乜要刷牙，呢個係禮儀嚟㗎嘛，佢話佢食咗薄荷糖就OK，仲阻止我去刷牙！」不過其實食薄荷糖也有效，並澄清因免疫力問題才會嘴唇發炎，跟Anson Lo沒有關係，但亦不忘補充，「不過薄荷味好強，越錫越凍。」她透露已拍了原劇的名場面「衣櫃之吻」，從不同角度拍攝，足足拍了8至10次，至於另一場在英俊家的激烈咀戲仍未拍，「而家熟咗，咀戲就會易啲。」
爭取更多COLLAR表演舞台
談到原定於9月12日舉行的COLLAR與泰國女團4EVE的《MUSIC UNBOUNDED LIVE MACAU - COLLAR X 4EVE》演唱會，昨日(3日)臨時宣布取消，Ivs So坦言感失望，因配合演唱會已準備好本周內推出團歌，「無咗個大型舞台表演，係有啲可惜，不過可以放喺(15日)的昂坪表演。」問到取消原因時，她表示早一兩天才知道，未詳細了解，「據我所知，唔係票房原因。」她明白fans會感失望，「尋日都知芯駖喺TG群組道歉，都知道fans準備咗假期又book酒店，希望嚟緊COLLAR有多啲機會同fans見面。」她表示今年會爭取更多大型表演舞台，希望明年COLLAR五周年會有更大型的表演。
ADVERTISEMENT
【APP會員限定 amFUN積分加碼賞登場】
