周潤發、蔡一智、黃浩然用近6.5小時完成20公里毅行者。 (娛樂組攝)
周潤發、蔡一智、黃浩然今朝8點在大帽山出發,用了6小時23分鐘完成20公里毅行者。發哥表示今次「好慢」,原因是大帽山有近7-8公里大斜路,「頂唔順丫!唔係腳震震,係甩髀丫!」蔡一智續指他們因為到千島湖打卡,所以又行多了一段路,發哥指因為很多朋友未來過,所以要一齊打卡。
黃浩然負傷上陣
發哥及阿智爆黃浩然負傷上陣,發哥說:「佢隻腳有啲扭親,佢上次玩好勁嗰個運動拉親,我哋就住佢,慢慢咁。」黃浩然則表示很小事。談到今次是50周年20公里限定版,黃浩然指機會很難得,發哥笑言一次就夠,「玩一次好啦!以後無再嚟!命都無咁長!」發哥出發前曾指怕見到蛇及鬼,問到他有沒有遇到,他指住蔡一智說:「嘩!呢條蛇幾大條丫!死鬼佬!佢就話唔舒服,呢條友行兩步又話拉下筋!佢叻嘛!」問到是否沿途和人自拍,發哥說:「必定要做啦!我哋做市民嘅嘢,為人民服務!」他又提到沿途邊食邊吹水,蔡一智表示有朱古力、飯糰等,笑謂爭少少一齊打邊爐。
發哥大讚BIGBANG騷好睇
苗僑偉及戚美珍專程到終點等發哥等人,他們三人表示很大鼓勵。發哥預告三哥三嫂明年會參加渣馬十公里,並笑謂:「卓Sir捉賊就叻,跑步唔叻!佢今日係北潭涌帶隊,叫苗英偉!我幫佢改嘅,佢英俊咗好多!我退隱咗啦!」問到鄭則仕(Kent哥)會否繼續跑,黃浩然表示會擔任保鏢為Kent哥護航,傍住他跑。發哥笑言Kent哥已成為渣馬吉祥物,「則仕do it !Just do it !」並稱為Kent哥改名為「鄭杞人」,他解釋:「佢成日杞人憂天,成日驚落雨打風!佢成日嗲我問『師傅,唔跑得唔得?杞人好識蛇王!』」
談到BIGBANG的G-Dragon(GD)在尾場台上特別向觀眾席的周潤發致謝,稱他為「Forever Young Superstar」,發哥大讚好看,對於被讚forever young,他隨即擺出手勢笑稱「奇奇都唔夠我勁」,指羅嘉良在《萬千星輝賀台慶》中再度化身「呂奇」(李奇)跳唱《難兄難弟》,之再向身旁的蔡一智問:「你有冇睇?」蔡一智表示有。至於有沒有影合照,發哥說:「部機係佢經理人!我想用自己機都唔得!要用大會機!不過周太有,我陪佢睇,佢三個都鍾意,係唔鍾意我啫!」




















