畢彼特同安祖蓮娜祖莉離婚，傳咗咁耐，上年終於惡夢成真。兩人因為經典間諜片《史密夫決戰史密妻》撻著，11年後兩人宣布離婚，不久，畢彼特又有另一部類型相近嘅新片《伴諜同盟》上映，傳媒好自然猜測，女主角瑪莉安歌迪娜係咪第三者？當然，全部都只係傳聞，早排陀緊B嘅瑪莉安已表明，同《一夜誘情》法國男星紀堯姆卡納感情穩定，擺明同畢佬劃清界線。雖然戲外無情，但戲內就好鬼浪漫，以瑪莉安嘅美色，絕對不輸當年嘅安祖蓮娜，咁到底畢佬同法國優雅美女好睇啲？抑或同美國豪邁打女有火花啲？
文：Wing
故事開首講述畢彼特要同唔識嘅瑪莉安合作，為掩人耳目而扮成夫妻。
雖然畢彼特演技十年如一日，但今次同新拍檔合作，都算有新鮮感啦。
柔情瑪莉安
瑪莉安最為人所知嘅角色，相信係《潛行凶間》入面李安納度個老婆Mal(當然唔止呢個)，同安祖蓮娜相比，瑪莉安屬於比較柔嘅女演員，(安祖蓮娜演出《緣海假期》都幾牽強)，所以《伴》嘅劇情再唔係兩公婆互相較技，而係女特務情挑男特務。女主角係「法國抵抗運動」特工瑪莉安，因為一次任務認識加拿大情報官麥斯，合作扮夫妻執行暗殺行動，後來假戲真做，兩人結為真夫婦。如果瑪莉安係你女神，呢段戲就好好睇，事關佢對麥斯一見鍾情，不斷向對方放電。放電呢家嘢，荷李活真係唔係好多人演到，現時當紮嘅幾位新世代女星如艾莉西亞菲瑾德、安娜姬妲妮及貝兒娜森等，氣場都比較強，而資深啲嘅如妮坦莉寶雯、麗素慧絲及琦溫絲莉等又太「資深」，後生少少嘅珍妮花羅倫絲，形象又未免太豪放。
瑪莉安曾經喺得獎作品《粉紅色的一生》飾演法國傳奇歌后畢愛荻，由年輕演到老年，演技細膩已經係人所共知，再加上服裝設計以《北非諜影》及《Now, Voyager》為藍本，效果自然相輔相成。今次畢佬同佢合作，不致於同前妻咁有火花同過癮，但有羅拔湛米基斯做導演，部戲自然唔止娛樂片咁簡單。
兩人相隔多年再度合作拍《緣海假期》，估唔到真係戲如人生，拍完就分。
兩人當年喺《史密夫決戰史密妻》中默契十足，被譽為荷李活金童玉女，最後珍妮花安麗絲頓慘變犧牲品。
豪邁安祖蓮娜
要講《史》同《伴》有咩唔同，最大分別相信係男女主角點樣撻著，《史》一開始就係男女主角火併時速，女主角焗爐藏槍，睇得又揪得，人物設定好符合安祖蓮娜本色——狠。呢部戲最為人津津樂道之處，就係兩夫妻互相較技，表面恩愛，實質鬥到想炸爆間屋，劇情充分利用安祖蓮娜狂野粗豪嘅外型，再加上佢拍《史》之前，已經有動作片代表作《盜墓者羅拉》系列，打女形象深入民心。因此，導演好聰明咁用一連串動作鏡頭推進故事，中間再穿插兩公婆扮恩愛嘅笑料，而最後高潮位就落喺主角知道被set up後，齊心搵幕後黑手一段戲。
《史》嘅故事比較偏向荷李活電影，一來因為佢真係美國片，二來，當年兩個主角都係炙手可熱嘅賣座演員，基本上，就係一部娛樂性豐富嘅Popcorn movie，兩個人默契十足，當年拍攝時仲傳出緋聞，令一對女尊男卑嘅銀幕夫妻，就咁橫掃全球逾4億美元票房；今個星期上映嘅《伴》片，戲路同《史》的確相似，但主角兩公婆關係發展就完全唔同。
ADVERTISEMENT
【👇請你去香港迪士尼樂園Pixar Summer Fest👇】
