鄧炳強巡視舊樓發現4大消防安全隱患　介紹「佳哥」到樓宇改善支援中心｜Ray Online

佐敦華豐大廈上個月發生3級大火，保安局局長鄧炳強留意到近期大家加強關注舊樓消防安全，一於聯同消防處巡視舊樓，搵出4大消防安全隱患。

鄧炳強喺社交網站分享短片，佢邀請消防處樓宇改善策略辦公室高級消防區長黃旭平去巡視舊樓，提到舊樓有4類好常見嘅隱患，分別係市民將雜物放喺逃生通道；消防設備裝置已經過期冇保養，甚至已經損壞；防煙門長期打開，當火警發生嗰陣，濃煙會走入樓梯；天台逃生門鎖上。

舊樓有4大消防安全隱患

介紹完4大隱患，咁啱有「街坊」行樓梯上嚟。鄧炳強見到就問「阿叔，咩事唉聲嘆氣啊？」原來「佳哥」收到消防處嘅信，要求佢根據消防安全條例進行改善工程，要加消防喉轆同耐火物料，但佢一把年紀唔知點做好。鄧炳強就叫佢唔使擔心，其實消防處有樓宇改善支援中心提供一站式服務，一於睇吓有咩幫到「佳哥」，不過就要下回分解啦。