[特稿]點解要做「回帶20年棟篤笑」？巴閉囉，英雄主義囉，疊馬囉……其實係要疊水先啱數囉。
為咗搵一個清靜地方閉關寫稿，我已經住咗兩個星期酒店。我對香港旅遊業嘅貢獻真係超然㗎啦。
尖沙咀一帶嘅酒店從業員應該流傳緊一個都市傳說﹕一個香港本地男人扮遊客不停CHECK IN……
我有好耐無見過我個仔。昔有大禹治水三過家門而不入，今有我小豪子為搞棟篤笑夜夜不回家。為博台下一笑，真係唔講得笑。
喺香港想搞棟篤笑其實係攞自己嚟俾人笑，因為香港人好得意，你話你去踢波，D人唔會話，你有無踢到C朗咁勁先；你話你想做舞台劇，D人都唔會話，你有無莎士比亞咁勁先。
但唔知點解，一同人講想做棟篤笑，所有人第一時間就會話，「你估你係黃子華？」
所以D人下一句其實係想話，你唔好不自量力啦。
而香港好多做棟篤笑TALK SHOW嘅朋友，的確好多都係名氣界人士，歌星明星，然後做TALK SHOW，贏在起跑線。
我就唔係名氣界人士，我搭的士如果俾司機認出，返屋企係值得同老婆報告一次咁大件事㗎。
而我嘅拍檔陳嘉銘，亦係一個低調而高清嘅文化人……即係兩個都輸在起跑線囉。不過呢個亦係一種挑戰，就係我肯定所有捧我地棟篤笑場嘅朋友，都唔係貪圖我地嘅美色，而係真心想支持。
5年前，我地兩條友膽粗粗殺入上環文娛中心，講國民教育棟篤笑，竟然搞到3場。最開心係掌聲笑聲滿載溫馨，講真唔係賺好多，但掌聲係表演者最好嘅春藥。
回歸20年，其實我私心都係想向偶像黃子華致敬，以前睇《秋前算帳》，覺得係黃子華最顛峰嘅作品，完整講咗佢嘅政治思路，亦對九七作出好多預言。
後來係《拾下拾下》，佢都提到，97後香港，好似拍鬼片但無鬼嘅，無料到嘅。
我一直覺得，莫非共產黨嘅溫水係舒服到連子華大神都俾佢呃咗？咁20年後，隻鬼出咗嚟未咩？我地市民嘅反應，係咪又交足貨呢？子華大神未講嘅下半場鬼古，我地不如試下講埋佢啦。
嘩！你估你係黃子華啊？
我唔係，我只係一個，想用棟篤笑，同回歸20年算帳嘅，香港人啫。(曾志豪)
阿媽同我講過兩句話，好深刻！
第一句，係廿年前我學人寫小說寫笑話。之前我已經柄埋一輪，享受公開試Past paper，點知考完試又係柄喺房係咁寫；我媽就問我：「你覺唔覺得自己悶？」我話：「都覺，咁點？」我阿媽無可奈何，走開。
另一句，係前年我搞個棟篤笑叫《警犬自白》，俾人騷擾話我笑警察，我媽又同我講：「你可唔可以唔再學人講笑？」我話：「唔得，咁點？」我媽又無可奈何，走開。
有時，我想叫聲阿媽做「大佬」，後補一句：「睇住啲細喎！」不過難怪，如果我媽真係大佬，佢行走香港呢個江湖幾十年，見盡六七暴動、工業起飛、賊王拼死、大國崛起……食過夜粥，知道險情！所以佢明白，人人本死無大害，為嘅就係啲細嘅，點樣可以好好哋。講到尾，佢一手打出嚟呢個江山，想我自由快活。
咁我會問：大佬，咁其實你仲驚啲乜？我媽就會十足江湖片大佬上身：「香港已經唔係以前咁！」或者，佢見到九七後，就算冇秋後算帳，但係劏房似監房，官場似墳場，一句到尾：人人都危！佢擔心我，我理解；而佢擔心我講笑講得多，前途更坎坷，我明白。
所以，我想同我媽講：十年前我識咗個人，叫曾志豪，佢五年前同我笑咗一餐國民教育，大家都未死得，唔錯！今次再笑大啲，笑足廿年香港事，未至於有你以前遇過啲暴動同賊王，淨有回歸廿年啫，冇死嘅！
更何況，棟篤笑呢味嘢，日日喺香港橫街窄巷都發生緊啦！你睇，果邊賣抹窗工具阿叔，成日講「唧唧噴噴益街坊益街坊……」呢邊又有賣菜阿姐，不停叫「十蚊三份俾埋你俾埋你……」仲有，Sell寬頻、Sell保險、Sell做Gym、Sell美容……個個都開口埋口「介紹番俾你……」你以為佢地是但噏求其大合唱咩？實情係佢哋隨時講笑搞氣氛，都有小小強。
阿媽開始明白，但佢提醒我，笑一個人已經唔嘢小，何況要笑一個社會，仲要笑足佢廿年！
我話，放心，要笑咁多年，但係仲可以一齊生活，肯定好愛佢先做得出。講真，有得笑，無非係愛。所以，學人講笑，唔係要解悶，而係學識愛之深，笑之切。（陳嘉銘）
