每一個參加過中學公開試嘅香港學生，自然唔會對考評局陌生。(資料圖片)
香港考試及評核局1977年根據《香港考試局條例》而成立，出年就踏入50周年喇。為咗紀念呢個象徵長期服務教育界同社會嘅重要里程碑，考評局特別舉辦50周年標語創作比賽，等公眾可以用創意同具意義標語，表達支持同祝願。
參考作品制定50周年標語
參加者需要同時提交雙語標語，中文限14個字內、英文限20個字內，再加埋最多200字嘅創作概念說明。考評局秘書處會初步篩選所有參賽作品，入圍標語之後會由考評局委員會成員組成嘅評審小組評選。比賽分公開組同學生組，設有冠、亞、季軍、我最喜愛的標語獎及優異獎項，當中冠軍可獲價值5,500元嘅個人電腦、亞軍有價值2,000元嘅電子書閱讀器，季軍就得800元書券。
公眾即日起到下個月31號都可以上網提交作品參賽，之後9月會開始公眾投票、10月初公布結果。考評局仲話，日後會參考獲獎同優秀作品，嚟做50周年嘅標語。
網民：見鬼勿O嘴，潛水怕屈機
每一個參加過中學公開試嘅香港學生，自然唔會對考評局陌生兼有一份「特別感情」。唔少網民回想到當年應考經歷，紛紛喺社交平台創作標語，「考評五十春與秋，考生幾代共憂愁」、「年年試題年年深 問君能有幾多愁」、「幾年寒窗苦讀 一次生死定局」，更有人二次創作試卷主要題型，「你同意否？試析論之 此說當否？試析論之」。同時，有網民直接引用2008年香港中學會考中文試卷五閱讀材料嘅其中一句標語，「見鬼勿O嘴，潛水怕屈機」，幫大家重溫當年考評局被指亂用潮語嘅集體回憶咁喎！
ADVERTISEMENT
【👇送小米智能家品新品👇】
