中大運動科研健身室　助精英運動員創佳績

今時今日，體育運動早已經唔係一個人的奮鬥，長跑運動會有配速員幫跑手衝紀錄，精英運動員背後亦有好多科研成果嘅支持。話說香港中文大學喺大學體育中心新翼開設一個全新健身室，可以現場測量運動員嘅「乳酸閾值」，正正可以了解運動員喺高強度運動嘅配速上限，令團隊可以幫入讀中大嘅精英運動員調整個人化嘅訓練計劃。

除此以外，新健身室仲增設好多設備，包括可以即時提供力量、爆發力、下肢對稱性等數據嘅新型測力板，仲有時光閘、測速槍同埋手握測力器等，可以幫助監察運動員訓練進度同疲勞程度。中大體育部主任梁鳳蓮話，新健身室嘅新型運動器材，配合埋專屬可以監察訓練嘅程式，可以監察訓練進度，可以用嚟設定訓練目標，除咗可以提升訓練效率，仲可以減低運動員受傷嘅機會。

中大QS學科排名體育相關學科全國第一 

大學教育資助委員會2022年設立「學生運動員學習支援及入學計劃」，有60%經計劃入讀中大嘅運動員會選擇修讀五年制教育學士（健康與體育運動科學）或兩年制理學士（運動科學與健康教育）學位課程。兩個學科喺2024QS世界大學學科的相關學科排名中位列全國首位及全球第41位。