邱傲然Tiger個唱宣布6月開Part 2 爆喊攬band隊談笑MIRROR年過30年齡焦慮(有片+完整歌單)

MIRROR成員邱傲然（Tiger)今晚（20日)於麥花臣舉行首次個人演唱會《 Where It Begins" Live 2026》，MIRROR「大仔組」的楊樂文(Lokman)、AK江𤒹生、王智德(Alton)、陳瑞輝(Frankie)，「睇騷之鬼」李駿傑(Jeremy)、邱士縉(Stanley)，連較少睇騷的陳卓賢(Ian)都有現身支持。獲七位哥哥捧場的Tiger自言今年已27歲，「過多幾年，成隊MIRROR都過30歲！」引來全場爆笑。Tiger唱出多首八十、九十年代的流行經典，包括梅艷芳、張國榮的大熱作品，獲胞妹Kelly擔任琴手，兩兄妹更首度公開同台合唱，公開致謝時更搞喊「虎妹」。當唱畢出道作《ALRIGHT》時，全場觀眾大合場，接著他宣布將於6月舉行個唱Part 2，並多謝台上band隊樂手陪伴與付出時，一度掩面爆喊，眾人攬住圍圈，場面感動又溫馨。

Tiger兄妹檔首度公開合唱

演唱會以Band show形式進行，設有企位和暖場嘉賓。孭著結他的Tiger甫出場就呼喚觀眾企起身，以《Live the way I want》和《吃腐肉的鷹》炒熱氣氛。演唱會以「Where It Begins」命名，有「老靈魂」之稱的Tiger唱出多首陪伴成長的中外金曲，包括Britney Spears《Baby One More Time》、Westlife的《My Love》、Backstreet Boys的《I want it that way》和宇多田光的《Frist Love》和王菲的《愛與痛的邊緣》等，當唱鄭伊健的《一生愛你一個》時，請來劇集《存酒人》的安柔潔客串演「女友」，在「虎妹」Kelly的琴聲伴奏下，延續劇集一段未能開花結果的感情。接著Kelly彈著琴與Tiger合唱Sting的《Fields of Gold》後，Tiger直言是首次與「虎妹」公開合唱，「平時通常喺房喺廳合唱，真係好多謝我個妹，佢好叻呀！」全場觀呼拍掌，Kelly頓時眼濕濕，擰轉面抺眼淚。Tiger在完騷受訪時表示，過往的solo作品都由Kelly彈琴，順理成章邀請伴奏，「佢係易喊體質，我成日都見佢喊，睇咁多次《鐵達尼號》都喊，一定係對團隊好大歸屬感，先會真情流露，呢首歌係細個學拉丁舞，我哋一齊會聽嘅歌。」

與FC會長攬攬超感動

Tiger在演唱會盡顯band仔本色，走到場館中央小台，與亦師亦友的天衡結他battle，並首唱rock爆新歌《脱兔》後，除去皮褸外套，穿白背心接連獻唱梅艷芳的《將冰山劈開》、鄭希怡的《相對濕度》、陳慧琳的《失憶週末》時，其間來回大小舞台，又與fans擊掌，全場High爆，他受訪時坦言，唱得好爽，被問到可會再除衫時，他笑言，「我瘦到咁，無乜嘢好睇，(加緊操肌？)練好唱歌先吧！」談到與「小虎隊」(fans club)會長肉緊抱抱，他強調不是預設，「其實我唔知佢企邊，當時我第一個畫面，係嗰陣啱啱完咗《全民造星》，佢係第一個拎住塊燈牌，嚟俾我簽名嘅人。」當唱《ALRIGHT》時，小虎隊大合唱，他坦言好夢幻，滿滿的幸福感，「好開心，首先首歌係天衡班底去做，佢哋好用力唱俾你聽，係好鼓勵好支持，好似一齊合力去完成呢件事。」

同Ian玩「搖滾帝女花」

Tiger談到騷後感時，自爆唱到第三首歌已肚餓，但完騷不打算慶功，最希望能與演唱會團隊一齊放任打邊爐。談到在台上對著band友爆喊，他坦言，「無諗過嗰個位咁有感覺，我轉身見佢哋一字排開，就種好幸福嘅感覺，有班一齊玩一齊開心嘅人，陪著我咁多個月，好開心好齊心要做好件事，感覺好窩心。」回想大家搬20支結他排練和開騷，「感覺係夾band，唔係做嘢！」他表示，在開騷前才得知將於6月開Part 2，「無諗過呢件事，其實今次都冇諗過，可以喺呢個時候開個人concert。」暫時只知地點仍是麥花臣，但腳單、場次都未定，他說笑道可能會跳火圈、耍拳，「最想梗係開100場啦！」劇集《存酒人》獲觀眾投選最佳劇集等多個獎項，他感恩有機會參與，團隊努力獲觀眾肯定，至於《四鏡大暴走》獲選為最佳綜藝和最佳主持，他笑言是本色發揮，節目中他與Ian合唱《帝女花》的爆笑場面，fans仍無限loop，問到可會考慮搬上舞台時，他笑問，「搖滾帝女花？嘉賓梗系陳卓賢！」

鏡仔high爆企起身

談到MIRROR七位哥哥捧場，27歲的Tiger前張國榮的《由零開始》時，分享道「過多幾年，成隊MIRROR都過30歲！(全場起哄)你哋唔知呢件事咩？」他認真表示，「以前一直都唔唱歌，唱K都唔會攞住支咪，估唔到有咁多人，有屬於我哋嘅舞台，覺得好奇幻，好幸福呢件事，嚟緊嗰隻歌有句歌詞好有意義，唔知大家點解會睇到我，會唔會記得我，但咁多年嚟，大家都好似仲記得，覺得好幸福，以下落嚟呢首歌，亦係我第一次出現喺觀眾眼前唱嘅歌，唔使上網search都幾黑歷史。」台下鏡仔們high爆企起身，舉手揈頭跟住唱，Tiger坦言獲隊友捧場，意義重大，問到哥哥們的評價時，他笑言，「都係Good Show、辛苦喇，佢哋都承認咁年紀，好快就返屋企休息。佢哋全部都三十幾歲，(台下全中箭！)我又唔係第一日講。」問到是否開始有年齡焦慮，Tiger答道，「咁就無，突然發覺，因為夾band見到許多零幾年出世嘅人。」