農夫演唱會｜MC張天賦任嘉賓認小學開始迷上農夫古天樂以老闆身份壓軸登場砌燒豬

《農夫香港最好笑嘅演唱會》昨晚（9日）迎來第二場，現在熱烈反應不遜首晚，農夫二人在圈中向來人緣極佳，昨晚吸引大批圈中好友捧場，台下觀眾席星光熠熠，包括江美儀、高海寧、湯令山、洪嘉豪、Tyson Yoshi、MIRROR成員AK江𤒹生、Alton、ERROR成員193、肥仔等，場面相當熱鬧。

昨晚最大驚喜，莫過於農夫在演出中段邀請到MC張天賦擔任神秘嘉賓。當MC一出場，全場立即尖叫，三人首度同台，並合唱經典金曲《學海無涯》。MC全程不用提詞機，一字不漏地完整Rap出整首《學海無涯》，咬字清晰、節奏精準，連農夫二人也露出難以置信的表情。全場觀眾拍爛手掌，氣氛high爆。

主動唔要提詞機

唱畢後，農夫笑言邀請MC因為全香港只得他一個敢叫MC，名字勁Hip Hop！又大讚MC表現極具水準，陸永表示：「大家有無留意？我真係未見過有嘉賓可以Rap咁多，佢要求唔要提詞機。佢真係識我哋啲歌，我好肯定佢識過你哋（觀眾）。MC就笑住謙稱：「因為你哋話唱《學海無涯》，我就.......」陸永即搶答 :「就開始背喇。哈哈！」MC又自爆：「我真係細細個聽你哋啲歌大㗎！最早期我聽《我的野蠻女友》《奇蹟》，《韓國勁舞權》仲有《十年人事》、《十七年華》....好多好多。細個溫書嗰陣，我聽已經係DSE，我記得嗰時仲係小學，唔用正途去下載音樂，放入MP3入面聽㗎！你哋係我人生list上面其中一組人，我好希望可以嚟到你哋演唱會做嘉賓。係人都知，我做任何演唱會最緊要一定要提詞機，但今日我覺得你哋啲歌，如果我背唔到，就唔配上嚟做嘉賓！真㗎！所以我今日真係好開心，好少我做嘉賓係冇壓力㗎，呢度真係好歡天喜地。」全場再度報以熱烈掌聲，MC的真誠與實力贏盡全場歡心。

陸永大膽寸老闆

第二晚演唱會去到尾聲，正當觀眾以為最尾一首歌《高舉隻手》後圓滿結束，農夫卻再度殺大家一個措手不及。兩人所屬的公司「農作天下」，竟然在完騷後搬上舞台，舉行了一場極其隆重的「開張大典」。在觀眾的歡呼聲中，農夫邀出幕後「白武士」兼老闆古天樂，並一同上台切燒豬，令大家嘩聲四起，場面震撼又搞笑。

大螢幕上再度出現「農作天下」開將盛典後，向觀眾介紹，「你哋有冇發覺？農作天下，點解有「天下」兩個字？so fa so cool，又有個「cool」字？我哋公司之前未公開做過開張大典，好似有啲嘢未完成，係今日咁開心嘅時刻，不如我哋全場一齊做一個開張儀式好唔好？有請我哋公司國際榮譽霸道總裁！」當舞台大門打開，古老闆登場，觀眾立即站起來歡呼。當古天樂站台便大讚全晚觀眾氣氛一流，幾乎全程企係到睇騷，他笑言：「我諗呢樣嘢係咁解：乜嘢叫棟篤笑？你哋帶俾佢哋歡樂，佢哋今日棟篤喺度支持你哋。」陸永即取笑老闆：「我懷疑你呢段度咗三個禮拜，哈哈.....」C君：「拯救一間公司可能要白武士，但投資一間公司就要黑武士。多謝古老闆！老闆你驚唔驚我哋叫你嚟投資，將會係一個世紀大騙局？哈哈.....」古天樂就答：「多多支持，多多指教，今日香港需要開心歡樂！」繼而三人於台上一邊砌豬，一邊說：「風生水起，笑口常開。日後業務好唔好就唔知，一切交俾天命。」砌豬完畢，農夫兩人即拉著古天樂，認為他不可能單係砌豬咁簡單，隨即全場起哄。古天樂在農夫「半推半就」之下，戴起耳機，與農夫及全場觀眾一同合唱經典金曲《天命最高》！全場觀眾瘋狂尖叫，並且大合唱，將氣氛推向終極高潮。