大埔區關愛隊(大埔滘小區)向街坊派發福袋(Threads圖片)
最近大家都呻熱，不過有大埔街坊就收到關愛隊送嘅冷帽同頸巾。關愛隊解釋只係其中兩樣物品，其實福袋入面仲有適合夏天用嘅蚊包、毛巾等等㗎。
有大埔街坊喺社交網站Threads上載相片，分享噚日返到屋企，見到成層樓門口都掛住一個福袋。但入面竟然係冷帽同頸巾，佢反問：「大佬呀你知唔知呢兩日40度！」負責派發福袋嘅大埔區關愛隊(大埔滘小區)隊長、區議員陳笑權向《am730》解釋，其實福袋入面有5樣嘢，分別係蚊包、腰包、毛巾、冷帽同頸巾。
指街坊「個個讚到飛起」
陳笑權話除咗喺街派福袋，顧慮到長者行動不便、打工仔日頭唔喺屋企等等，仲專程搵義工大熱天時上門派福袋。佢話準備咗500個福袋，好多街坊收到嗰陣都豎起手指公、「個個讚到飛起」。佢強調關愛隊係好心、為社區、為居民，唔想老人家到冬天先周圍搵禦寒衣物，而家收到可以放喺屋企先，天氣一凍就即刻用得著。
ADVERTISEMENT
【👇免費註冊新會員 送海洋公園門票👇】
