許賢、蘇致豪、岑珈其與梁浩邦合演舞台劇《我在大戈壁沙漠收數的日子》。
許賢、蘇致豪和岑珈其在「試當真」後合體，與梁浩邦合演舞台劇《我在大戈壁沙漠收數的日子》，四人今日出席記者會宣布加場，暫定演出19場。許賢和蘇致豪兩位新丁，首次演舞台劇就要應付日、夜場，蘇豪信心滿滿，笑指自己體能OK，「做舞台劇要好大能量，最難係要保持精神，平時拍片可以瞌眼瞓，做舞台劇就唔得喇！」珈其被問到何時開拍新一輯《膠戰》，他指「6膠」都想繼續，笑言每次見到ViuTV高層金廣誠都會追問，希望下年有好消息。
張國榮「大熱」造型
談到今次的挑戰，已曾演出兩套舞台劇的珈其率先劇透，「我從來未遇過一個劇本係咁，最大挑戰係有啲場口要幾個人同時間不停講好多嘢，類似《寒戰》最經典嗰啲場口咁。我自己喺圍讀嗰陣已經覺得好困難！」講到兩位「劇場新丁」嘅表現，珈其笑著賣關子：「希望蘇豪可以每場都畀到唔同嘢，可能有現意想不到的『驚喜』大家唔好錯過呀，可能隨時要睇三、四場！」笑指，請大家務必搶飛。蘇致豪以長髮造型拍海報，他笑指是張國榮的大熱造型，符合大熱的氣溫，也希望票房大熱。
Delay笑 Vs陰濕笑
至於應如何招架「試當真」兄弟許賢、蘇豪和珈其合體，梁浩邦（阿邦）揚言：「圍讀嗰陣我盡量唔會揀坐喺佢哋中間！」他又透露指一眾演員圍讀時已經笑料不斷，「佢哋好鍾意讀完對白之後停喺度，諗返之前幾句，然後再笑返之前嗰幾句。」其中蘇豪經常出現「Delay笑」，而許賢則被阿邦形容為「陰濕笑」。許賢笑著解釋：「因為個劇本係超現實，而我又明明地，所以嗰刻覺得自己同編劇潘Sir有種精神交流，會忍唔住嘴角上揚。」珈其則自認笑點最低：「我都好驚呀！之前做過兩個舞台劇都試過『爆蟹』，今次會盡力忍笑啦，希望做到最好！」《我在大戈壁沙漠收數的日子2026》將於10月2日起假香港藝術中心壽臣劇院荒誕上演，加開場次於今晚(13日) 10時開售。