周星馳作品《功夫女足》在港上映第二周，與星爺合作多作的林子聰(肥仔聰)首度掛上聯合執導之名，他卻指與星爺合作模式多年沒大改變，形容繼續「佢跑緊，我哋不斷追緊」的狀態，不過就覺得現在輕鬆了，「而家佢舒服啲，佢以前佢拍完人哋，就自己化妝埋位，今次大家都退去後面，佢會輕鬆咗。」他笑言最享受是幕後試戲，沒大壓力又過足戲癮。
最難係吸引觀眾入場
再次以足球為題材，《少林足球》珠玉在前，「六師弟」肥仔聰坦言難突破前作，「最後放棄咗呢個諗法，不如換全女班，無論風格、故事，全部都唔同，唔好比較，當作係套新戲，以前係『做人冇夢想同鹹魚有咩分別』，今次就，『贏得起，亦都輸得起』，一開場成班已經好踢得，個個都身懷絕技睇下點贏，點知輸咗，希望減少所謂突破嘅壓力。」反而，現今最大挑戰是怎樣可令觀眾再次走入戲院，唯一答案是「好得你唔會喺手機睇」，故此今次幾乎全綠幕拍攝，亦補圓了上次未實現的夢想。
當年拍戲受傷
肥仔聰特別提到《少林足球》一句對白「如果加上你身輕如燕水上飄坐陣，我們上中二路地攻擊可以說毫無破綻！」當年他因受傷未能完全展現心目中的畫面，「以前真係滿足唔到，當日已經想輕功不單止上天，落地都可以一陣風咁走，點知我拍完上面就跌落嚟受傷，跟住嘅場面就拍唔到。今次就可以拆開嚟拍，雪野上面飛，另一個就下面快，拍番晒出來，可謂圓夢。」
互相補位冇分工
談到榮升聯合導演，可說是星爺的肯定，林子聰卻指一班兄弟習慣互相補位，「咁多年嚟大家都唔會刻意分工，邊個崗位唔夠人就要去，正如當日幾師兄弟動作場面，都係由二師兄(莫美林)做晒，唯獨我太肥佢替唔到我。」多年來與星爺合作，都身兼數職，「如果唔夠人寫劇本我就去，場記唔夠人又叫我頂，係去到《美人魚》，比較專注導演工作多一啲。今次周生都冇同我講，到成咗片先話我知，其實工作性質都係差不多。」合作多來，問到星爺的改變時，「佢都不斷學緊，大家都不斷學，呢個就係佢點解可一直拍落去，又keep到每次都合觀眾口味。所以我哋不斷追緊佢，佢跑緊我哋又跑緊。而家佢舒服啲，佢以前佢拍完人哋，就自己化妝埋位，今次大家都退去後面，佢會輕鬆咗。其實最享受係同佢演，度完場戲就演下，睇下得唔得，大家都好happy。」
全綠幕 教起新演員
今次起用不少新人演員，沒有實景，難度大增，「有實景真人易好多，當年衰衰地都有百幾人坐觀眾席，個波又係真嘅，而家拍係方便咗，唔怕日曬雨淋，但演員就要有100%幻想力。要幻想現場有幾萬名觀眾，幻想個波嚟緊，幻想要跑，我都做過新演員，要大家係咁幻想真係難啲。」故此不時提點演員，演「喪彪」的胡予安首次演戲便登上大銀幕，她自爆，「我係一張白紙，唔知群像戲係咩，可能前前面有人演，我就喺後面發呆，佢就會提我，咁會好明顯見到。佢又會翻譯下導演的要求，等我哋知道要點做。」
胡予安乞衣look試鏡
胡予安(Angel)本身是wakesurf導師，曾代表香港出賽，周星馳是學生之一。某天突被星爺可有興趣演戲，「我冇諗過覺得太遙遠喇。」接著兩日後的傍晚，她原打算與母親吃飯，突然接到試鏡電話，「佢無端端傍晚6點打電話嚟叫，叫我去佢公司見面，我費事人哋等，著住拖鞋、成個乞兒咁、素顏、紮個馬尾就去，當時仲要比現在肥2、30磅，因為知道要演柳飄飄。所以我心態是俾最真一面你睇，個機會係你就係你，但我自己知自己事，我試完戲就覺得自己會中。」林子聰補充指她試戲表現自然，加上要找極度粗獷的女演員演喪彪不容易，胡予安是第一位落實的演員。
不介意演醜角
問到可介意初次演戲就做「醜角」，胡予安笑言，「我從來冇當過自己係美女，所以沒所謂，反而現在出席打扮靚靚出席活顧，大家話原來喪彪咁靚，會覺得我演技好，塑造一個唔認得嘅角色，呢個反差會更有滿足感。最開心係角色叫「喪彪」，明顯是香港人講廣東話對白，非常地道。」
雪野唔知周星馳係邊位？
雪野則是從內地來港旅遊時在街上被發掘，獲邀試鏡。年僅19歲的她根本連誰是周星馳都不知道，起初以為是電騙，由父母聯絡試鏡，「第一次面試，很多人坐在前面，我不認得哪一位是周星馳，所以我向每個人都說一次︰『導演好！導演好！』」直至有人指出星爺才是導演，她才恍然大悟。首次面試只叫她跳舞和扮見到鬼的反應。其後第二次面試，才真正讀對白試戲，「「我始終沒有演戲經驗，所以首先都是把台詞記下來，然後我跟導演話不好意思，台詞我背不下來他們說會給我充足時間，最後花了一個小時才背起。最後又要我跳拉丁舞，我其實不會跳，憑自己記憶跳一次。」
天然呆夠寸
試鏡過程看似不太順利，為何被選中，林子聰解釋，「佢唔講嘢嘅時候很酷很寸，其實係天然呆，但有種距離感，令身邊人不敢跟她說話，正正因為個角色就係唔講嘢，成日黑口黑面，好適合佢。」加上拍攝時不可化妝，令她cool得更自然，至於角色名字，他笑言，「因為角色未諗到名，佢個名夠酷，索性叫雪野。」
文、攝：GRACE
ADVERTISEMENT
