薛影儀對感情方面，當遇上心儀對象會十分進擊。
曾有「亞視一姐」之稱的薛影儀（阿儀），平時睇落怕怕醜醜，原來對感情方面卻十分進擊！42歲的阿儀近日頻頻更新社交平台，更大晒「甜美笑容」，自拍露齒笑，並留言「我咁笑即係開心」！
近日阿儀與好姐妹黃榕接受訪問，其間阿儀談到心上人身在馬來西亞，指對方透露有可能將來會為阿儀從大馬移居來港生活。其實，阿儀早在三年前已透露暗戀這位昔日亞視高層，可是對方已返回大馬生活，兩人雖分隔異地，但阿儀一直未有變心，對這位心儀對象從一而終。訪問過程中，身旁的黃榕更爆料，指阿儀每逢2月14日情人節、3月14日白色情人節及5月20日「520」，均會向對方表白講「我愛你」，揭露阿儀勇敢一面。
去年阿儀接受am730訪問時亦曾提及其心上人，自爆因一張性感照曾激嬲對方，阿儀稱：「我之前sent相俾佢，佢嬲咗。我沖完涼着咗件內衣sent咗相俾佢，你見嗰啲KOL都係着內衣褲。」故她之後去水上樂園也保守地穿上一件頭泳衣，連出發前亦特別向男方備案。自從遇上這位「亞視高層」，阿儀似乎已認定對方；在她40歲生日時，曾與好友大搞模擬婚禮，壽星女披上嫁衣，被安排嫁給由男性友人扮成的「亞視高層」，並由黃榕充當伴娘，不過畫面卻被網民直指似足冥婚。
