經民聯主席盧偉國與粵劇演員余仲欣成婚
73歲嘅經民聯主席盧偉國星期日(11日)同相差40載嘅粵劇演員余仲欣拉埋天窗。盧偉國喺婚事過後，再分享更多當日嘅甜蜜婚照。
盧偉國分享兄弟們當日到達「盧家」佈置花車，佢就負責親自駕駛開蓬法拉利348 Spider接新娘。原來呢架珍藏多年嘅紅色法拉利，同新娘子一樣係1994年出世，盧偉國慨嘆係緣分。
黨魁為黨主席證婚
兩人選擇喺上水馬會雙魚河鄉村俱樂部舉行婚禮，因為新娘鍾意騎馬，亦係一名獸醫，曾經喺馬會實習。由於場地所限，婚宴嘅規模唔大，只有300位來賓，所以好多至愛親朋都冇辦法邀請。經民聯黨魁吳永嘉律師負責證婚，盧偉國話黨魁為黨主席證婚，「誠佳話也！」
晚宴喺雙魚河草地舉行，盧偉國形容：「場內恭賀之聲不絕於耳，場外賀訊亦如雪片飛來」。佢話兩人成長時期唔同，有賴社會培育，得以發展專業同興趣，並獲回饋社會嘅機會，兩人由衷感激。
ADVERTISEMENT
