英國May姐再拿份脫歐協議出去國會，一樣出事。脫歐係政治問題，唔單只脫歐，而係大家都想做瓜首相，但冇政客想呢個時候去執掌政權，於是就由得May姐掛響度做首相。政治就係咁：保守黨係一個弱勢政權，冇北愛嘅政黨合作根本就唔能夠組成政府。May姐想點？進又唔得，退又唔得，捱下捱下又一日。
英國首相文翠珊
May姐最大件事就係昧於形勢，唔夠薑向身邊之反叛分子，包括疑歐或親歐大將玩「梭哈」，即係晒你冷，迫佢地收聲。但係自己形勢弱盟友又少，真係病到沙聲都冇人可憐。咁樣拖下拖下，去到大選時，冇人知英國幾時脫歐了……。
政權膠著嘅，唔止英國，仲有委內瑞拉。執筆之時，當地仲係停電。大佬呀，明眼人都知係有陰謀啦。問題係邊個咁大整蠱呢？執政黨鬍鬚佬梗係賴美帝，反對派瓜得多就話電力公司都冇錢去維修，點會有電？咁冇電，大廈水泵又泵唔到水上樓。電視見嘅就係市民去街拿水又拿上樓。美帝呢？睇下鬍鬚佬博爾頓嘅推特，日日都嘈要委內瑞拉總統負全責。委內瑞拉危機，講咗成個月，點解仲未推倒嘅政權呢？幕後有乜「刁」呢？西班牙傳媒傳出，美帝要求西班牙幫手，收留委內瑞拉現政府內有意逃亡嘅官員。咁即係話，莫非傾好收留之細節，執政黨鬍鬚佬就會走佬？不過，今次係侵侵上台以來，首次用盡死力去拉倒一個政府落台。如果搞唔掂，咁侵侵果啲新管治風格，恐怕收檔矣。
美帝四處撲火，當然唔會放過北方大國。博爾頓上周受訪，問及中美關係時，即刻同意主持人所講，即係北方大國經濟唔掂，證明侵侵之關稅政策有效云云。講到咁，博爾頓一再講，侵侵只會簽對美帝有利之協議。如是者講咗兩次。如果看官仲信話，美帝想傾好呢個「刁」，真係令人懷疑。侵侵如意算盤係將中美談判同連任競選工程捆綁，咁就發達矣，睇下北方大國，會唔會同侵侵顛落去？
香江要睇好打得民望。波叔講完預算案，佢支持度就碌返落去35%。升兩次跌一次，真係一浪低過一浪。咁落去，冇人可擔保佢連任。依家頂住佢支持度都係深藍同埋少數淺藍之支持者。如果建制派想做佢世界，只要搵一班深藍KOL質佢幾嘢民生政策，搞到深藍支持者走失，咁好打得就真係微臣無力可回天矣。問題係，深藍幾時會出手。老實，依家出手實太早。最佳算盤係，響立會選舉前後，迫好打得做一啲不得民心而又激到泛民紮紮跳之大撕裂政策(包括法律啦)，又或者用一些激烈之政治議題(例如乜獨物獨)，再部署好選委選舉狂掃議席，再響佢民望大跌時，拮一刀啦。
買包花生當睇騷啦。呢啲見血封喉嘢，關你鬼事？ 倫敦大學亞非研究學院法律系博士