上星期Xbox Series X公開發售日與定價(同時公開埋入門版Xbox Series S)，11月10日賣$3,880，意外地抵玩確有好大叫座力。另一邊一直等緊對手出招再還擊嘅PlayStation，也終於決定香港時間9月17日凌晨公布，可惜今期稿土下座等唔切PS5發布，但點都搵啲嘢寫啦！話PS4 VS Xbox One勝負已分相信大家同意，但今次PS5 VS Xbox Series X又係完全唔同嘅戰場，兩者嘅規格、護航作、外觀設計到網上功能，全部都左右到大局。平心而論，機能方面Xbox暫時贏，不過護航作方面又去返PS5贏，機身設計Xbox比較古典穩陣，PS5就係玩一種完全未見過嘅外形，各有千秋同捧場客。至於市場策略方面，暫時會覺得Xbox更強，因為佢哋率先採用Xbox Game Pass呢樣「俾月費任玩」嘅Netflix式消費模式，玩家唔使下下買碟、放碟，直情一個月費任你玩，彈性更大又有數得計(月費先百幾蚊)，對唔少財力不足嘅朋友就更加吸引，可以話係必殺技！期待PS5會點出招，無論如何好快就有新機玩！