香港網絡世界咁多偽娘，靚嘅有，搶眼嘅有，但MC Yip呢個人，係另一種存在。佢唔係靠妝、靠裙、靠人設去搵attention。佢係真心活出自我，而活出自我呢4個字，聽落浪漫，做落其實代價大到你未必承擔到。訪問佢嗰陣，我問咗一條網民成日講嘅嘢：「有人話你靠偽娘身份搵錢，你點睇？」
MC Yip完全冇停頓，斬釘截鐵咁答我：「偽娘唔係我嘅人設，偽娘MC Yip就係我，我就係偽娘MC Yip。」
嗰一刻我覺得：呢個人真係好清楚自己係邊個。佢唔係做show，唔係做角色，佢係活出佢本身。呢種坦白，其實係一種勇氣。因為活出自己，係要承擔所有眼光、所有誤解、所有人覺得你「唔正常」嘅聲音。但MC Yip最特別嘅地方係：佢鍾意偽娘嘅自己，但佢同時又好愛自己原本嘅身體。佢唔會變性、唔會食荷爾蒙藥，因為佢覺得自己與生俱來嘅嘢已經好靚。呢種自我接納，唔係講出嚟就得，係要真心欣賞自己先做到。然後我問咗一條我自己都好想知嘅問題：「你唔用藥，咁老咗點算？偽娘形象會唔維持唔到？」
佢聽完即刻笑咗，嗰種笑係chill到不得了：「我好喜歡我自己，但唔代表我要永遠用同一個風格打扮。如果有一天我老咗、體格變大件，我咪改變囉。可能到時我係行好型嘅路線呢。」呢句說話好輕，但其實好重。
重在接受變化、別人眼光、批評並不容易，而他亦有型在佢知道自己嘅核心唔係妝、唔係裙，而係佢對自己嘅認同。講到呢度，我想反問你哋一句：
大家活出自己未？
我哋而家係尋找緊自己？唔敢做自己？定係做緊笑人做自己嘅人？
MC Yip至少係活緊佢自己，而且佢願意承擔代價。如果你問我：「最靚偽娘MC Yip老左點算？」
我會答你：
佢老咗都會靚，只係靚得唔同。
因為佢靚嘅唔係外表，而係佢對自己嘅誠實。
Tim Sir林雲峯
香港催眠輔導中心創辦人
亞洲催眠治療及輔導協會創會理事
催眠治療師
哲學企業諮詢師
www.hcchk.net