香港新世代鋼琴演奏家張貝芝(Joyce Cheung)是一位「Cool Kid」，不只打扮與談吐之間散發個性魅力，更透過內在涵養中流露自我。當她站在琴鍵前，只須雙手一揮，全情投入的英姿與起伏迴蕩的樂韻渾然交織，令現場氣氛瞬間轉變，牢牢吸引觀眾目光。
今年6月下旬，哉絲憑爵士專輯《The Études》勇奪台灣「第36屆金曲獎」「演奏類最佳專輯獎」殊榮，成為全晚唯一來自香港的得獎者。按照節目排序，今屆她有份問鼎四個獎項計有：「最佳演奏錄音專輯獎」、「演奏類最佳作曲人獎」(憑單曲《Étude No.1 in D – Carpark》入圍)、「演奏類最佳專輯製作人獎」，以及「演奏類最佳專輯獎」。前三項名落孫山，當時哉絲已打定輸數：「記得我個感覺係，其實有得參與呢件事已經係好大嘅recognition(認同)，同埋每一個(入圍)單位都好好，好出色，我可以趁嗰個機會認識唔同嘅artists，我覺得好大開眼界。」
直到頒獎嘉賓──著名音樂創作人陳明章讀出自己的名字時(另一位頒獎嘉賓為台語金曲歌后黃妃)，哉絲先與丈夫Johnny相擁而笑，再到台上領獎，她說那一刻非常高興，「亦都好grateful(心懷感激)，我覺得好抵啊呢件事，因為佢係『Best Instrumental Album』，即係包括成件事啦，成個album有份參與嘅所有人啦，所以我覺得，有得代領大家呢個獎好榮幸。」
法文中，「Études」一字有「練習曲」之意，哉絲說，這張專輯之所以誕生跟疫情有關，時維2022年。「疫情啦，好多時間，就同鼓手阿Dean(「翻騰三周半」成員李駿銚)一齊start咗啲practice sections，因為冇表演機會。咁我就好想練一啲odd meter嘅，即係五拍、七拍呢啲嘢，後尾開始練嘅時候就發覺……點樣為之你練到呢？就係你可以用出嚟，所以就整一首歌出嚟，去represent我練到或者練緊嗰樣嘢，咁就開始咗(創作)『練習曲』第一首歌。」
自問對古典音樂了解有限，所以想趁機問清楚「練習曲」其實是甚麼。哉絲說古已有之，「我以前classical piano嘅training(訓練)，都係彈好多Études㗎嘛，蕭邦嘅Études，佢有寫好多唔同嘅系列，就係唔同嘅key(音調)，練唔同嘅嘢，咁佢係(寫)俾佢學生練嘅，我寫呢個系列就係俾自己練囉。」那麼「練習曲」跟其他蕭邦作品又有何分別？她解釋：「有冇分別？全部都係嚟自佢(蕭邦)嘅講真，但係purpose唔同囉，有啲可能係要dedicate俾某啲人，有一啲全部都係Waltzes華爾滋(或稱圓舞曲)，有一啲係Études，係specifically寫俾佢學生。但而家啲人就可能嗰12隻Études入面，有一隻係特別多人鍾意嘅，就會攞嚟做showpiece(傍身的演出曲目)，或者(用作)考試，或者(作為)比賽歌。」
第一首《Étude No.1 in D–Carpark》完成後，第二首《Étude No.2 in Fm–Church》、第三首《Étude No.3 in A – Father》、第四首《Étude No.4 in Gm – Bare》接續誕生。哉絲坦言，這些作品的命名，有時來自錄音時的地點，有時則反映作品對她的特殊意義。「譬如第一隻係《Carpark》，因為我哋係喺我studio個carpark嗰度錄嘅，live recording(現場錄音)，之後第二隻叫《Church》，因為我係搵咗個chapel(小教堂)去嗰度錄，但係入面練(習)嘅嘢呢，我就冇擺喺個title入面嘅。冇呀，就係一啲我覺得首歌對於我嚟講，個意義喺邊度，我就擺個咁嘅title落去。For example第三首係《Father》，咁係因為本身嗰首歌嘅由來，都係同(基於)一個父子關係去寫嘅，係另一個commission project(委託項目)，所以就有一個咁嘅title，到我寫嘅時候，都有諗返我同我daddy嘅關係，或者佢嘅聲音，如果我用音樂嚟到表達，究竟係點樣呢？」
疫情結束後，哉絲的生活再度忙碌起來，只好暫時將《The Études》的創作擱在一旁，直至2023年7月，她飛往台灣，在當地逗留兩個星期，扚起心肝將這張專輯「埋尾」。「因為我想做呢樣嘢呀，我想有一個milestone，或者應該係話，當疫情之後，啲嘢返番嚟嘅時候，我就發覺，我已經冇擺時間落去我自己啲嘢度，或者你覺得：『啊～終於有嘢返嚟』嘅時候，你就要抓緊每個機會，要做晒所有嘢。所以就take咗呢一個break去做呢件事，跟住就要plan下點樣去錄音啊，咁啱我哋又喺台灣錄音嘅，之後再喺台灣得到呢一個honour，所以覺得what a great story！」