放榜與樂壇頒獎禮
放榜與樂壇頒獎禮DSE放榜，今年狀元人數創新高，當中仲有分「狀元」、「超級狀元」同「終極狀元」。其實狀元即係第一名，如果有一個「終極狀元」，咁其他最多都係叫「榜眼」或「探花」，點解會出現16個狀元呢？呢種僭建名目嘅做法，或者都係參考樂壇頒獎禮嘅邏輯，就係最緊要係吸引到眼球。每年都有好多樂壇頒獎禮，亦有好多個獎項，但邊個先真正有代表性？目前頒獎禮獎項主要根據播放率或投票決定，不過，播放率高係咪等於多人聽甚至多人鍾意呢？尤其是而家香港有幾多人聽電台呢？而投票獲得最高票數，又係唔係等於大家覺得係最好呢？其實「身體最誠實」，大家每日揀咩歌聽，就最能夠反映邊首歌受歡迎，得到樂迷認同。而其實今時今日要掌握呢個數據並唔難，大部分香港人都係用串流平台聽歌，將所有平台數據集合，歌曲高下就一目了然，而最多人揀來聽嘅歌咪就係年度之歌囉。有咁客觀又科學的數字唔用，寧願年年頒完個獎又惹來好多猜疑，無他嘅，年度之歌得一隻，就好似如果真係得一個狀元的話，焦點就會太少，加多幾個名目又多啲故仔可以講，流量自然又會高啲。做放榜就好似頒獎禮一樣，讀者/觀眾多啲焦點，多啲人被祝賀，學生/歌手又會覺得威啲，學校/唱片公司又會開心啲，家長舊生/粉絲又會自豪啲，滿滿的情緒價值之下，最緊要係頒獎禮門票價值高啲。退一萬步，唔使成年得一個獎咁極端，其他計播放率或投票計嘅獎可以照頒，只係加一個「全港最多人自選播放年度金曲」都得㗎。不過若果有個咁客觀同具分量嘅獎，其他獎項嘅關注度必定會大大減低。或者有人會覺得，多啲名目咪多啲人開心，唔好咩？如果啲人唔會因為一啲僭建名目而影響自己待人處事嘅心態，即係「狀元」唔會覺得自已真係叻過所有人，就忽視其他做人應有嘅態度，其實又真係冇咩問題，我對香港莘莘學子有信心。咁，萬千寵愛在一身歌手呢？