女團的宿命
COLLAR啱啱完成第二次演唱會，綜觀網絡反應正面，唔少人都讚成個演唱會俾人非常團結嘅感覺，即使個人表演部分都散發團魂氣息。7個女仔表現亦各有進步，舞蹈同唱功亦都明顯下過苦功。
我相信無論本身係唔係COLLAR粉絲，都睇得出佢哋係一個非常勤力嘅女團，成員各有特色，除咗少女味濃吸引大量男粉絲嘅Ivy同Day、Marf同COLDPALY合唱過咁國際化嘅形象，都成為COLLAR嘅王牌。全隊可以話有齊各項元素，樣樣嘢亦對辦，但COLLAR嘅優點似乎一直都未被完全看見，到底佢哋面對緊乜嘢困局呢？
第一，女團係唔係一定比男團商業價值低？女粉絲一般比男粉絲瘋狂，呢個定律冇人會質疑，但香港呢個情況係更加明顯。日本人對御宅文化、男性追星等行為相對開放；而韓國女團更以亞洲女性嘅獨特風格，喺近呢10年打入歐美市場。但係一個以華人作為主要市場嘅女團，似乎仍然打破唔到男團比女團更加有市場價值嘅呢個現實。
第二，社會對女團嘅固有形象。COLLAR賣點係一團多元，有歌精、有舞勁、有型格、亦有可愛，而整體都勤力，亦好有團魂，元素齊晒，但係粉絲好似有一個玻璃天花板咁，突破唔到一個更大嘅基數。我覺得原因之一係大家對女團有一個固有印象，就好似大部分韓團咁，個個頭髮長長、樣子甜美，對腳又長又瘦，若果唔係呢種典型模式，即使係幾多元素，幾有實力嘅女團，都無法突破到某一個觀眾層面，有質素同有個性嘅女團，似乎離不開「叫好不叫座」嘅宿命。
以上兩點，聽起上嚟好殘酷，但亦都係現實。一個咁勤力，每次都睇到佢哋進步，我覺得係香港極少數真係有團魂同愛嘅女團，我諗極都唔明點解佢哋都只能喺亞博一個細場搞演唱會呢？好多人話應該去坐到成萬人嘅Arena，你估佢哋同公司唔想咩？好明顯係佢哋都知道粉絲數目仲未突破到。乜嘢觀眾群就會衍生乜嘢偶像，我哋越嚟越睇得多短視頻同冇營養嘅內容，只係值得擁有某一類嘅偶像，會唔會又係我哋嘅宿命呢？