姜濤墮海，全城討論，連《東張》都連報兩日。意外第二日見到姜濤現身，講返事發經過，仲繼續去巴黎時裝周，老實講我真係安心晒。安心係因為人冇事，而我並唔係因為我係姜糖，而係覺得社會咁殘酷對待佢，姜濤仍頂得住，仲用行動證明自己冇事。單睇今次，已可睇到姜濤面對緊幾恐怖嘅環境，我大致分為以下三種「恐怖」︰
1) 無盡嘅謠言。意外消息一出，已有好多猜測、流言，個個都講到自己目擊咁，又講到自己好了解姜濤，知道佢有咩開心唔開心。事實上，成件事嘅原因同經過，我相信只係得一個人知，就係姜濤，所以我只信佢講嘅版本。不過呢個世界嘅人似乎係鍾意想像，多過想知道真相。
2) 無限嘅毒舌批評。姜濤甚至鏡仔haters多就一直都知，但去到當晚留言嘅刻薄程度，連幫口嘅岑珈其同娟姐都被人鬧埋，我覺得已超越haters嘅角色，直情超出「人」嘅所為。最令人不安嘅係，有人形容叫人「唔好咁黑心」同「積口德」係「違反人性」，冇諗過呢啲普世價值都有討論空間。
3) 無所適從嘅期望。意外翌日照常出活動又去巴黎，公司被人鬧足一日「冇人性」後，姜濤澄清話係自願，想出來做嘢話俾大家聽自己冇事，公司反而係叫佢休息下。姜濤仲透露公司之前已放咗佢假，近月姜糖不斷批評公司冇俾姜濤宣傳新歌，而家案件重組，原來係佢放咗假，放完假重投工作，但大家又覺得佢應放假，咁其實放假定工作好呢？又好似日前見面會咁，爭取出來見下粉絲等大家安心，縮減活動平衡下，粉絲可以見到偶像，偶像又唔使咁操勞，但又被批評安排混亂，咁其實做唔做好？
以上只係我睇到嘅「恐怖」，我睇唔到嘅相信都唔少，可以頂得到，真係唔簡單。好多人叫公司放過姜濤，其實近一年我見佢工作冇之前咁頻密，都不時放下假，似乎公司都希望佢輕鬆下，真正應放過姜濤嘅，應該係長期攻擊佢嘅人，今日你哋嘅「多口」批評同留言姑且係「涼薄」，但難保有一日會累積到令人頂唔住，就唔再只係「多口」，而係成為「兇手」。