MIRROR的7年之癢？
MIRROR成軍七周年，婚姻有「7年之癢」，韓團亦有「7年魔咒」之說，因為韓國規定偶像同公司之間嘅合約，最長只可以係7年。7年，似乎對唔同嘅關係來講，都係一個重要嘅分水嶺。對於MIRROR，成軍7年會係里程碑？定係轉捩點呢？會繼續前行？定係走向解散？我覺得要視乎以下3個元素︰
1. 成員意願。任何關係最重要都係個人意願，MIRROR嘅情況複雜好多，要睇12個人嘅意願。鏡仔走到第7年，團以外，大家各自喺跳唱、唱作同電影上都有發展，人氣當然亦有差異。或者會有人覺得，唔使靠個團都可以發展得好好，我睇到鏡仔喺見面祭時感言，都話大家雖然偶有意見不合，但MIRROR始終係大家嘅根，冇MIRROR就冇今日嘅成就。展望未來，大家係唔係仲珍惜呢個連結，覺得要「把根留住」呢？
2. 粉絲期望。鏡粉7年來確係陪伴MIRROR走過高低，不過粉絲之間嘅「互片」，比對外更大火力。大家可能覺得只係護「主」深切，但正如Edan喺感言時分享，面對外面風雨，大家更應團結，而唔係……(佢冇講落去，明就明)。娛樂圈說到底都係一個供求市場，粉絲有需要，偶像就會有堅持嘅理由。鏡粉們想做「後盾」定「矛盾」？
3. 公司策略。大家成日批評公司，呢樣唔好，嗰樣又做得唔夠。我覺得公司確實有好多可以做得更好嘅地方，不過，以一盤生意、仲要係一盤長遠嘅生意來講，最重要係點樣同埋有冇能力令到個品牌(MIRROR以及各鏡仔)有延續性，咁先會繼續有市場。我睇到嘅係，成軍7年，佢哋已跳出香港，全團將會上MAMA舞台、有機會拍台劇韓劇，仲有唔少成員喺外地拎埋獎項，公司一直擴展緊佢哋嘅市場。
今年，唔單只有人講MIRROR成軍7年，亦有人開始話佢哋係倒數3年，相信來緊要面對嘅挑戰都唔會少。就好似閃避球一樣，面對四方八面嘅攻擊，避得開、接得住，玩到最後就係贏家。