Ad Block Ad Block
娛樂
2023-11-27 04:30:17
日報

當《東張西望》關心「某男團」

分享:
MIRROR

當《東張西望》關心「某男團」

MIRROR演唱會補場換飛,大台《東張西望》一連兩日以「某男團」報道一班「苦主」。我覺得呢單嘢係一個生理課題,點解?先分享下「苦主」們嘅指控,以及我八到有關演唱會嘅幾個重點:
1)「唔知道舊飛要換,主辦方只喺自己社交媒體公布,有冇搞錯?」事實係九成半以上嘅人已經換晒飛,究竟係主辦方宣傳不周,定即使鋪天蓋地宣傳,有啲人都唔會接觸到?我終於明白點解電騙講咗咁多年,都仲會有人上當。主辦方一年前已講明有退飛安排,之後又宣布補場同換飛安排,持票者有成年去換。我當你只追蹤個別成員嘅社交平台,睇唔到公司公布,都睇到換飛時送紙扇,啲fans互相交換啩,退一萬步,公司次次公布都有傳媒報道,又睇唔到?

2)「我之前係尾場第一行,而家換唔返,點解張敬軒、鄭秀文又做到?」事實係MIRROR演唱會同其他歌手嘅補場唔同:MIRROR要轉場地,由紅館去亞博,萬幾人變9千幾人,四面台變三面台,現實零可能做到個個同一場同一行。我聽講公司都知道場地安排唔同咗,會編排多啲演出喺T字台,而家投訴自己坐遠咗嘅人,到時會發現自己對正台。

Ad Block

3)「《東張西望》講完之後,公司就話可以退錢,擺明補鑊。」時間線上好似幾啱,不過我聽講主辦單位其實預咗換飛後,會有班因各種原因去唔到嘅人,所以一早就決定會安排退錢,諗住細節逐步公布,點知間接幫咗《東張》「成功爭取」。邊個領功唔緊要,最緊要鏡粉收貨,而我又見到有鏡粉開始話大台居心叵測。

Ad Block

成件事,你話《東張西望》為民請命,或者陰謀論話佢想打擊MIRROR,都得;你話主辦方溝通混亂,或者你話佢地面對史無前例複雜程度都有九成半以上人順利換飛,亦得。我睇到嘅係,無論係支持者定係攻擊者,對MIRROR相關嘅事,經已去到一秒即有生理反應,而呢個反應唔係基於信任與不信任,似係無用過隻耳同個腦,而係把口或手指快過一切。

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受