藝人要不要管？
保錡@ERROR最近上咗前港姐李珊珊嘅網台節目，李珊珊大爆當年喺TVB會被高層「教育」要點樣回應傳媒，逐份剪報、逐句同佢講「可以答好啲」、「唔應該咁樣答」。保錡聽完之後一臉愕然，形容自己「大開眼界」，因為ViuTV係好自由，從來唔會有呢啲事發生。
兩代藝人、兩間公司、兩種做法，究竟公司對藝人應管教定係俾自由？
支持管教︰藝人始終係公司嘅員工，講咩做咩都係代表緊間公司。早前有間公司嘅員工直播期間冇熄咪，暗諷消費者係「冤大頭」嘅對話出晒街，拖累公司股價下跌5%。足證員工做錯嘢係可以影響成間公司，甚至股東。更何況係一個有知名度嘅藝人呢？藝人講錯一句嘢、做錯一件事，都可以影響佢哋嘅作品，拖累埋其他藝人、幕後團隊、公司同贊助商。所以從公司嘅立場，嚴格管教藝人，其實係合理地保護緊公司。即使唔係100％控制到，起碼都令藝人有啲恐懼而提高警覺。
支持自由︰認為公司係將藝人當成「一個人」，唔係一件貨。人係有自由意志，加上做得好定唔好，自己都會承受。而家呢個年代，亦唔係管就會聽話，唔可能100%控制到藝人嘅言行，與其用「恐懼」管，不如用「文化」去培養，建立一種「自由度＋互相負責」嘅文化。讓藝人擁有自由，偶爾可能會碰壁，但會加速藝人成長，而公司亦會同你一齊承擔。當然，缺點係藝人碰壁時公司可能都會有啲損失，或者都值得嘅，長遠建立到一種文化同反映到公司嘅視野。
睇晒兩邊論點，我覺得一個留言係最啱︰「管又話係極權、唔管又話冇公關」。所以結論係︰打和！Super！