呢排睇劇立立雜，基本上新劇都冇放過，回歸舊劇仲睇緊有《The Walking Dead》，然而經已雞肋到唔恨，其餘黃金編劇Shonda Rhimes幾齣大熱劇《How to Get Away with Murder》、《Grey’s Anatomy》及《Scandal》已成肥皂，尤其《How》，犯駁亂晒大籠，我都好嬲自己仲唔棄劇，每個禮拜浪費幾個鐘。文：Carman Chan
真正行屍
《TWD》上半季明明寫到Negan幾咁殘暴可怕，用scare tactics打沉晒Rick一夥；忽然下半季回歸靠兩集推演，成班人鬥心返晒嚟，為咗季尾打大佬的例牌劇情需要，角色內心衝突變化不夠時間醞釀都要夾硬扭，觀眾自然relate唔到投入唔到invest唔到，這就是character driven同plot driven的分別，一套曾經叫無數鐵粉撕心撕肺狂煲的熱爆劇，淪落至此，劇組唔該自己撼頭埋牆。
大星師奶
講起soapy，HBO本周首播這套《Big Little Lies》，以中產社區一所學校開學日掀開序幕，一班年輕媽咪帶著年幼子女返學，表面和睦私下較量，誰比誰事業有成婚姻美滿子女聽話，牌面就咁睇要幾soap有幾soap，但若果係拍師奶劇，又何需動用到大星妮歌潔曼及Reese Witherspoon來演？二人劇中均飾演專心在家相夫教子的家庭主婦，Reese的角色Madeline再婚，與第二任丈夫育有兩名兒女，大女跟前夫所生，前夫變心另娶更年輕貌美的Zoë Kravitz，大女步入青春期跟後母更投緣，激死生母；妮歌放棄律師事業下嫁靚仔有型的Alexander Skarsgård，育有一對孖生兒子，給其他家長背後笑她老妻少夫。中途加入Shailene Woodley這位單親媽咪帶著兒子住進這個社區，來歷不明，似有不可告人秘密。三位主角基本背景短短一集已完整交代。
內有乾坤
故事以學校周年晚會弄出謀殺案開始，編劇刻意不交代死者身份，也不拍死狀，只以警察盤問案發現場眾人帶出死狀可怖，引發觀眾對兇手極度凶殘的聯想，也專登跳過不拍三位主角接受盤問戲份，故佈疑陣等大家估估下，是否其中一位主角就是受害人。我沒看過此劇的原著小說，更加不會專登搵劇透睇，只可以說一個咁肥皂底的劇本，導演拍來算相當克制，剪接鏡頭運用都有點心機，不會像看TBB劇般公式化及老套。三位主角稱職，尤其妮歌的角色好像最有內蘊，對她的backstory最感興趣，雖然她塊面實在太過光滑緊緻，一點也不像老妻少夫中那位老妻。
