梁國輝執導的新戲《觸電》剛於周四(9月18日)上映，故事由梁導與身兼動作指導的羅浩銘(Ken)負責創作故事，賀鑫及鐘湦靈秀兩位編劇撰寫劇本。在普羅大眾眼中，阿Ken一向都是肌肉發達、渾身是勁、出招快過諗橋的動作演員，何以今次執起紙筆，投身創作大海？原來是老闆古天樂的意思。
阿Ken清楚記得，2018年某天古老闆相約公司一班藝人飯聚。「佢就話做artist呢，唔好成日等運到……鼓勵我哋一班artists去諗一啲故事大綱，佢話：『你諗到，拎返嚟公司。』」古老闆列出四個條件，阿Ken轉述：「第一：唔可以太貴，中、小型budget。第二：個故事係正能量、勵志嘅，唔好寫啲好dark、好變態、好血腥，唔好寫嗰啲嘢。第三：呢個故事一定要有動作元素，方便我去賣埠，去sell唔同嘅平台。第四，佢(古老闆)話呢一點最重要：你要說服我，點解同一張戲飛，我唔睇億元嘅荷李活製作，我要睇呢套戲。」
阿Ken的外婆是另一個促使他創作的契機。「我婆婆有腦退化症，我上網搵好多資料，點樣可以延緩呢件事。但係當我搵到嘅時候已經太遲，佢嘅情況已經好惡化，我就發現原來外國好鼓勵長者打機，一定要電競，係competitive㗎喎，『叮叮叮叮』(普通遊戲)嗰啲唔計，就會刺激到佢哋延緩呢個腦退化。我就覺得，如果一班老人家同班𡃁仔打機對撼都幾得意，跑唔夠你跑啫，打機可能未必(輸)。」
資料搜集繼續進行，阿Ken發現原來電競選手的退休年紀相當細，「廿到抆，三十(歲)就要foul，換啲十幾歲上嚟。我話：吓？打拳都唔使咁早退休喎，電競咁快退休？」他覺得「被迫提早退休的電競選手」與「一班長者」兩個點子相當有趣，於是嘗試將兩者結合：「2018年我寫咗個故事大綱，拎俾公司，但當時係被turn down咗，係ban咗條橋嘅。」既然此路不通，只好暫時放下，但每套戲都有自己的命運，去到2019年，一次偶然機會，當阿Ken翻開舊電腦見到最初構思《觸電》的資料時，重燃創作決心。
「我點睇都覺得個故事其實真係幾得意，我記得當日老闆講嘅嘢，佢點解唔鍾意，我就將(他)唔鍾意嘅嘢全部out走晒。我再加啲新嘅元素落去，譬如家庭，即係老人癡呆之外，勵志呀，熱血呀，除咗愛情，我冇寫愛情嘅嘢──呢啲係後尾兩個編劇加落去嘅──我就寫咗個好完整嘅故事大綱，再一次俾公司。咁今次老闆睇完之後就OK咗喇，佢話：『你俾監製幫你搞啦，咁就開始咗漫長嘅創作之路……我同導演，同埋兩位編劇四個人，奮鬥咗一年半去寫個劇本，由第一稿，去到第九稿，中間有好多嘢改，但主要條骨(骨幹)冇變到，都係根據我當日個故事大綱去寫。」
寫好劇本只是起點，如何將它拍出來才是關鍵。戲中的動作場面尤其艱巨，最令阿Ken難以忘懷的，是在赤柱污水處理廠拍攝的電競決戰場口。
「嗰度係ending，好大壓力，因為一定要完成呢件事，同埋高潮位不容有失，我哋係兩日就要拍晒，真係好唔夠時間。」一個設在岩洞裏的污水處理廠，衛生狀況有多惡劣可想而知，「係臭到生人勿近，成地都係死曱甴！」第一日已直踩18小時，僅僅讓器材充電後又要繼續開工，阿Ken感激幕後團隊的堅持與努力，並特別提到攝影師蕭慶華(Derek)。
「第二日嘅時候呢，臨完(收工)㗎喇，12點幾，佢真係暈，唔係就咁腳軟，係成個人冇意識。佢臨暈之前嗰刻將部攝影機遞高，唔係用隻手扶地下去救自己，佢要救部攝影機先，我哋衝埋去想去攬佢，但太遲喇，佢扻咗落個地下度，但係救返部機。我哋即刻話唔好等call白車，準備架車送佢去醫院先，扶佢埋一邊，除佢口罩，幫佢撥扇，俾啲白花油佢聞。大概過咗5到8秒佢醒返喇，你知唔知佢第一句問咩？『部機有冇事？！』嗰陣時真係又感動，又好擔心，我話不如同你去醫院檢查先啦，佢第二句就係戴返口罩：『拍埋先啦！』如是者我哋就完成到件事，所以幕前你見到啲演員好努力，幕後付出都係好大！」