COLDPLAY的加冕
COLDPLAY嚟香港演出，Marf@Collar擔任嘉賓，表演獲洗版式盛讚，一戰成名。有幾點觀察想分享︰
1. 美事都會被攻擊：有去現場睇嘅人，相信都會認同Marf嘅表現出色。我見到嘅係，一個22歲嘅女仔，壓得住場，將混合廣東話同英文嗰段唱得好有groove。而拍住國際級天團COLDPLAY同歌手Elyanna，Marf即使舞台經驗最少，都完全駕馭到。不過有部分人只聚焦第一晚演出甩咗個音，即使有大批現場觀眾為Marf平反，攻擊方向又轉去「Marf應單飛啦，俾COLLAR拖累」之類。我認為呢種已超越「雞蛋裏挑骨頭」，而係「雞蛋就係骨頭」，總之有彈冇讚。亦有人認為所有讚美都係公司打手，傻啦，佢哋公司打網絡戰邊有香港其他娛樂公司咁有計謀，網絡文化確係立場先行。
2. Marf唱英文歌嘅口音係令人好有驚喜，而佢唔係讀國際學校，亦冇去過外國讀書。咁好聽嘅口音，據聞係因為佢由細到大都聽英文歌，久而久之就練成「鬼妹」口音，整體感覺亦非常國際化。呢啲唔可以一時三刻扮到嘅嘢，佢係真心鍾意同浸淫於呢個文化。
3. 22歲有咁嘅舞台表現固然犀利，而我覺得Marf任何時候都咁瀟灑同輕鬆嘅性格亦係關鍵。由《全民造星》開始，已睇到佢係好有決心嘅女仔，但佢總有一種舉重若輕、處之泰然嘅感覺。Marf亦都好善良，好多人表面好識做人，但其實只為利益，紅咗就會露出真面目。有啲人話自己幾咁愛音樂，其實愛嘅係獎項及名利，但Marf有決心上進，同時亦要愛舞台多於名利，都造就佢嘅成功。
4. 當初仲有人質疑係公司俾錢，事實係COLDPLAY親自喺芸芸本地歌手中揀咗佢。當然幕後團隊一直將Marf推向國際，亦為佢鋪咗一條好好嘅路。今次公司亦把握機會投資好多做好個表演，特登出首英文歌，又有band又有dancer，排練同技術上都揼本。而今次投資有回報，聽講下月會推出Marf主演嘅電視劇，個劇名夾都冇咁準，叫做《那一天我們會紅》。