任天堂嘅岩田聰社長離世後，即將面對第一個冇咗岩田社長嘅東京遊戲展(TGS)。其實任天堂向來都唔參加TGS嘅，不過亦會選擇喺TGS前後宣布新消息，至截稿一刻，仍未知任天堂今年會有乜嘢消息，外間最希望見到嘅，相信係岩田在生時公布過嘅新機「NX」，相信就算得張概念圖，都可令任天堂股價直線上升。香港媒體(甚至係負責遊戲嘅記者)普遍都唔熟悉遊戲業，其實就算乜都唔搞，都唔見得任天堂有甚麼危機。就好似一致俾香港記者忽視、為《超級瑪利奧》系列誕生30周年而開發嘅紀念作品《Super Mario Maker》，喺上星期推出後就即時成為日本玩家新寵。呢隻game最特別之處，係玩家可以利用Wii U嘅Game Pad去設計關卡，並share去任天堂server俾其他玩家下載挑戰，關卡就算設計到超級難玩都好，只要設計者自己曾經過關就可以分享。近日最人氣嘅，係一個過關率僅有0.09%嘅「鬼畜關卡」，唔少網民都自發拍片挑戰，當中有條成功過關嘅15分鐘影片，因挑戰者死足近百次更令佢成為人氣no.1。呢種可以吸引到玩家自發宣傳遊戲嘅效果，足證任天堂影響力仍然驚人！